Shillong, Jylliew 18: U Chief Engineer jong ka PWD ba dei peit ia ki surok bah ‘National Highway’ u BP Marak u la ong “kaba thikna ba ka surok PWD ha Mawtap kam dei tang kaba siang rong , ngi dang wad ia ki kot kiba ia dei bad katei ka jaka”.
Haba kren ha u SP News Agency ha kamra trei kam ka jong u Chief Engineer ba dei peit ia ki surok bah ha ka jylla u la ong ba, ka PWD kala ai ia ka jingbit ban shna ia ka lynti iaid kjat kane ka dei ka jingshisha, hynrei ha dien ba la ioh ia ka jingthoh na u Extra Assistant Commissioner ba dei peit ia ki kam khyndew jong ka East Khasi Hills District ka ophis kala ong ban pynsangeh shipor.
U Chief Engineer u la ong ba ka PWD kam shym la weng ia ka jingbit kaba la ai dei halor ka shithi kaba la thoh ha ka 22th Jymmang 2018 na ka ophis jong u EAC jong ka East Khasi Hills District ba ki sa pynsangeh ia ka jingbit ba la ai haduh ban da lah ban pynbeit ia kane ka jingeh.
Katkum katei ka shithi kaba la thoh na ka ophis jong u EAC jong ka East Khasi Hills District kala kdew shai kdar ba ka don ka jingialeh mukotduma hapoh jong ka iing bishar hapoh KHADC dei na kane ka daw ba ka ophis kam kwah ba kan mih kano kano ka jingwit ha dien ha bud ka sa pynsangeh shipor ia ka jingai jingbit, ka ophis kam pat pynduh ia ka jingai jingbit ban shna lynti iaid kjat la shu buh teng shipor.
La iathuh ba na ka liang jong ka ophis mynta ka dang wad ia ki kot ki sla ha kaba ia dei bad kitei ka jaka bala shna surok ha Mawtap. Na ka liang jong u CE jong ka National Highway u la pynthikna ba ka jaka jong ka PWD kam dei tang ki bynta ba la siang rong, hynrei ban pynshisha ia kane ki dang wad ia ki kot ki sla ba ia dei bad kane ka jaka.
