Shillong, Iaiong 20: Ka seng Hynniewtrep Youths’ Council mytna ka sngi kala phah da ka jingthoh sha u Bah Lahkmen Rymbui myntri ba dei peit ia ka tnad pule puthi jong ka sorkar jylla ban kyrpad ia u ban pynmih ia ka hukum ba ha kane ka por ba don kane ka Lockdown ym dei ban phah siew baiskul lane bai kolej.
Ha ka jingthoh kaba la phah na ka liang jong ka HYC kala pynpaw ba ka daw jong ka jingkyrpad jong ki ia ka sorkar ban nym phah siew bai skul ka long ba jan baroh ki long iing ki don ha pdeng ka jingkyrduh ha kane ka por. Ka seng ka iohi ba namar ba kam don kano kano ka jingbthah na ka sorkar ki jaka ai jinghikai kin pan ia ka bai skul.
Ka HYC ka kyntu ruh ia u myntri ka tnad pule jong ka sorkar jylla ba ha dien ba la plie ruh ki skul colej bad ki skul bah kim dei ban pan noh mar dor ia ka bai skul hynrei dei ban ai por ban siew ia ka bai skul. Ha ka juh ka por ka seng ka dawa ba ki jaka ai jinghikai baroh ki dei ban siew ia ka tulop jong ki nongtrei ha ka por ba biang. Ia kane ka shithi la phah da u bah Enlang Sawian secretary ba dei peit ia ka kam pule hapoh jong ka seng.
