Shillong, Jymmang 10: Ka seng JSU hynne ka sngi ka lah thoh
sha ka sorkar ban sngap lem ia ka jingud ki paid nongshong shnong ka jylla kiba dang sah kut haduh mynta mynne sha bar jylla.Ka seng hadien ba ka lah ioh shibun ki jingujor bad ka jingud jingnam jong ki khynnah pule bad kiba lah trei kumjuh na ki kmie ki kpa jong ki.
Ka seng ka lah thoh ban pyrshah ia ka hukum ka sorkar kaba lah rai ban shuh phah leit shaw hi ia kine ki baha ing na shabar ban wan phai hi noh sha ka Jylla.Ka seng kam sngew iahap khyndiat ruh ha lor ka hukum jong ka sorkar kaba dang shu mih shen ban ai da ka transit pass ia ki baha ing ban leit shaw hi noh ia la ki khun bad kiba ing na sha bar,Ka seng ka lah buh jingkylli ia ka sorkar halor ka hukum ba lah pynmih da ka Political Department dang shen lyngba u Chief Secretary u M.S.Rao.
Ka seng JSU ka lah buh ia kine ki jingkylli hakhmat ka sorkar bad ka sorkar ka dei ban lah ban ai ia ki jubab kiba biang. Yn leh kumno iakito ki bym lah ban leit shaw daka kali.Sa katno kin iai ap. Hato ka sorkar ka lah moa ban pyntikna ba ka lynti ka synkieng kaba jngai da ki hajar kilometar ka long kaba shngain.
Kan jia aiu lada ka duh noh ka kali hapdeng ka lynti kaba jngai ban poi. Mano ban pynbiang ka bam bad ki jaka sah ia ki ha ki lynti namar ba ki dukan bam bad sah baroh ki dang khang. Hato yn jia aiu da ki shah bat sha kiwei ki jylla. Katno ngut eh kiba tip iaka lynti kaba jngai ban leit shaw ia la ki baha ing.
Ka seng ka kwah ia ka sorkar ban sngewbha ban ai ia ka jubab ha lor kine ki jingkylli shuwa ba kan buh ia ka jingim ki nongleit shaw ha ka jingma.Kumba ka seng ka iohi mynta ,ka long ba ka sorkar kam kwah ban shim ia ka jingkit khlieh ia kine baroh bad ka kwah ban lait ka jing pynlut na lade.
Lada ki phai sha ka hukum jong ka Sorkar pdeng jong ka Ministry of Home Affairs kaba lah pynmih ha ka 29th April,2020 kat kum ka kyndon kaba 4 ym shym lah thoh ne hukum ban leit shaw da ka kali shimet iano iano kiba dang sah kut shabar.
Ka seng ka kyrpad na ka sorkar ba ka dei ban leh eiei noh ia kiba sah shabar ban leitshaw ia ki da kaba suk ba kin ioh ban wan sha Ri lajong bad ynda ki lah wan phai kin bud thik ia ki kyndon ka tnat ka koit ka khiah.Ka seng ka lah ong ba bun ki kmie ki kpa ki lah ud namar ba ki khun kiba dang pule ki lah ban kulmar bad ktah haka bor pykhat lada dang pyn jrong ia ka pakhang shnonh namar ka jingpur stet ha ka sien kaba ar jong u khlam COVID 19 .
Ka jingpynslem ban ioh lad ban wanphai sha la ka jylla kan buh jingeh ia ki khynnah pule bapli namar ki jinjar ban ioh ka bam kaba biang bad don napdeng jong ki kiba shah pynthut ha la ki trai ing namar ka baiwai ing bad lah don ruh ki bym ioh shuh iaki lad jingiarap na wei na ar bad ki sah jinjar da kaba bam tang da ki biscuit ban lait na ka iap thngan.
Ka seng ka lah ioh ban ia kren bad u wei na ki samla Khasi uba dang don ha nongbah Pune , une u samla u lah ialeh katba lah ban wad ki lad jingiarap iala ki para jylla kiba dang sah kut ha nongbah Pune .
Une u samla u lah pynpaw ba lah don ym duna 200 ngut eiei na Maharastra bad Gujarat kiba lah kwah ban wan phai ing namar kim lah ban kyrshan ialade namar kim ioh tulop shuh bad lah don kiba lah shu sah ha khrum ki jaka trei kum ki hotel ha ki por ba lah dep u lah ong ruh ki briew bad ka sorkar jong kiwei ki jylla kin ym lah bam pynbiang man ka por ia ki.
Ka seng ka lah ong ba lah ioh jingtip ba lah don ruh haduh 120 tam kiba shem jinjar shisha kiba dang sah ha nongbah Kolkata namar ki lah shu shong khlem ki lad jingiarap bun na kine ki dei kina trei ha ki jaka trei hadien pa ki lah pyndep ia ki Skills Development and Training Center bad ki lah pynsngew ba ki lah kwah haduh katta katta ban wan phai sha la Ri la jong.
Ka seng ka pynbor ia ka sorkar ban wan ialam ia kine ki khynnah pule bad kiba trei kiba lah shem lanot shisha namar lah bun ki jylla ki lah pynbna lypa ba ki jaka pule kin ym plie haduh u bnai June.
Ka sorkar kadei ban wan rah iaki da ka jingsngewthuh bad kiwei ki sorkar jylla, khlem da pynjynjar iaki baha ing baha sem jong ki bad ynda ki lah wan phai ruh kidei ban sah ha ki jaka quarantine kiba biang khamtam ia kito kiba wan na ka jylla bad ki jaka kiba lah kynthup ha ka Red Zone. Kane ka long katkum ka kyrwoh ba lah phah da u Publicity secretary u samla Treki Mukhim jong ka JSU.
