Thoh ka KHNAM ha u CEM ka KHADC, ki bar jylla ba niah taxi kim don Labour Licence

Shillong, Risaw 08: Ka stnat trei kam jong ki samla jong ka party KHNAM mynta ka sngi kila thoh sha u Bah HS Shylla CEM jong ka KHADC ban pyntip sha u ba ki ki bar jylla kiba niah taxi kamai ha Shillong kim don ia ka Labour License.

Ha kane ka shithih kaba la phah mynta ka sngi kala iathuh ia u CEM ba ka KHNAM kala dep ban pynlong ia ka jingkhynra  ia ki taxi kamai ha kane ka nongbah Shillong kiba la niah da ki bar jylla bad la shem ba u wei ruh u nongniah taxi um don ia ka labour license.

Baroh ki kali kiba la khynra da ka KHNAM ki long 139 tylli ki taxi kamai. Kane ka jingkhynra ka long ha ki thain Polo, Khyndailad, mawprem, Laban bad shiwei ki jaka, ka KHNAM ha kane ka shithi kala phah lang ruh ia ki number kali katkum ka jinglap ka jong ki.

Ka KHNAM ka ong ba ka jingioh lad jong ki bar jylla ban khaii lait lan kan wanrah ka jingma ka bakhraw  ia ka jaitbynriew rit paid, kham tam  ha ba la iohi lupa ia ka jingrungkyrtep jong ki bar jylla ha ka kyrteng ka khaii ka peteng.  Kane ka long ruh ka jingkhanglad ia ki samla kyrduh kam kyrduh jam.

Ka Trading by non-tribal Regulation 1954 section 3A(b) “la batai shai kdar ba ka Executive Committee kan hap khmih bniah shwa ban ai ia la trading bad labour licence, la u Khasi u la lah ne em ban trei ia katei ka kam.

Kum ba iohi hi, kiba bun ki Khasi ki imja daka ba kamai kali bad ki la lah bha ban trei ia kane ka kam, namar kata KHADC ka dei ban pynmih noh da ka jingpynbna ban khanglad noh mardor ia ki bar jylla ban kamai taxi bad ban pynshitom ia kito kiba leh pyrshah katkum ka ain. La ong u Bah Thomas Passah president seng samla ka KHNAM.

 

What Next?

Recent Articles

Leave a Reply

Submit Comment

*