Shillong, Risaw 24: U bah John Anthony Lyngdoh u wei na ki nongialam jong ka party BJP ha Meghalaya u la phah da ka jingthoh sha u President jong ka seng u bah Ernest Mawrie ba ka long kaei kaei ka bym sngew tynnad ban iohi ia ka jingkren klumar khlem da burom shuh ia ki ar ngut ki MLA kiba don ha ka sorkar MDA.
U bah John A Lyngdoh u la buh ruh ka jingkylli mano bala bthah ban iaid lait ia ki MLA namar ba ki dei ruh ki dkhot hapoh jong ka koordination committee, la ong ba lada don kano kano ka jingeh dei ban rah sha ka kommittee ban ia kren.
U bah John u buh ruh ia ka jingkylli ba balei hap ban rah ia ki phang ia kren sha bar jong ka tei ka kynhun khlem ka jingtip jong ki MLA jong ka party BJP. La pynkynmaw ba ha ka jingialang jong ka kommittee jong ka seng ha ka jingiadon lang ki MLA u bah AL Hek bad u bah Sanbor Shullai ha kaba la khang ban leit sha ki lat pathai khubor.
Ha ka shithi u bah John u la kyntu ia u president jong ka party BJP Meghalaya state unit ba u dei ban sangeh noh ia kane ka jingkren lap lah bad katkum ka jingkular ka long ban shim khia ha kaba ia dei bad u pud u sam bad kum ka party ba dei ban ialeh ban pynioh ia ka ILP.
Ha ka shithi u bah John u la bynrap ia kaei kaba la kren da u bah AL Hek, bah Sanbor ba ka jylla ka dei ban wan ha khmat, wan sha ka party bad ia lade kan long ha dien bad u la ong ba dei ban sangeh noh ia ka jingpan lynti rel sha duh Shillong hynrei ka dei ban long tang ka rel kit jingkit ha duh byrnihat.
Haba ia dei bad ka jingthaw ia kane ka sorkar MDA, u la ong ba u president ka party BJP Meghalaya Stat Unit um dei ban kam ba dei ka BJP ba pynlong Myntri Rangbah ia u Conrad, ka jingwanrah ia u Conrad kum u myntri rangbah ym dei ban klet ia u Dr Donkupar Roy president ka UDP bam kwai ha dwar ublei ryngkat u Amit Shah, Rajnath Singh bad u Himanta Biswa ban khanglad ia ka congress ban wan ha ka bor.
Haba ia dei bad kane ka sorkar MDA u bah John u la ong ba u bah Ernest um dei ban kren stad namar ha ka jingialang jong ka party BJP kaba la long ha Imphal kala shim ia ka rai ban kyrshan ia ka sorkar u Conrad ha kane ka jylla Meghalaya ban pynneh ia kane ka sorkar haduh ba kut ka san snem, la ong u bah JA Lyngdoh ha ka kyrwoh kaba u la phah sha ki lat pathai khubor.
