Thoh u Bah John sha u CEM ka KHADC, khot ia ka dorbar hima Mylliem ban pynim ia ka Ri Khasi

Shillong, March 08: U Bah John Kharshiing mynta ka sngi u la phah da ka jingthoh sha u CEM jong ka KHADC u Bah PN Syiem ban kyrpad ia u ba un khot ia ka dorbar jong ka hima Mylliem ban pynim ia ka Ri Khasi.

Ha kane ka shithi kaba la phah sha u CEM jong ka KHADC u Bah John u la pynkynmaw ia ka shithi kaba la thoh ha ka 11 tarik  August 2015, ha kaba la kdew ia ki jingeh kiba ka jaidbynriew ka ia kynduh, namar ki ain kiba bun kiba la pynjari bad kiba la wan treikam namar bym don kano kano ka jingiada kaba kyrpang hapoh ka Constitution Ri India.

Na ka liang jongu Bah John u la ong ba la sngewdei ban kyrpad ia phi ba phin sngewbha ban lum bad khot ia ka Dorbar Hima Mylliem, ha ryngkat ki Myntri bad ki Kur, Basan, Lyngdoh, Myntri, Lyngskor, Lyngdoh Raid, Syiem Raid, ki longsan, ki Rangbah Shnong, ki nongkitkam shnong, bad ia “u khun u hajar” jong ka Hima ba kin ioh ban ia thir ia tai halor ka jingeh.

Kaba ki khun ki hajar ki ia kynduh namar ki Ain  Indian Registration Act 1908, Citizenship Act 1955, ‘Municipality of Shillong’ and Shillong (Administered Areas) Municipality, para 20 of Sixth Scheduled, The First Schedule 2. Assam ….“Khasi States”, Income Tax Act 1961, The Meghalaya Building Bye Laws 2011, Cantonment Act 2006, National Highway Authority Act 1988, The Coal Mines Nationalisation Act 1973, the Mines and Mineral Development Regulation Act, Forest Conservation Act 1980, bad bun ki central Acts, Rules ki  Regulations bapher bapher kiba ktah jur ia ka Riti ka Dustur jong ka Hima Mylliem.

Kumban shu pynkynmaw ngi la iai kyntu ia ki CEM KHADC kiba bun ngut, bad lada phi kynmaw ia phi ruh kum juh naduh ki snem 2012 ban sngewbha khot bad lum ia ka Dorbar Hima Mylliem, lada kwah ban pynim ia ka Ri Khasi, namar ka dei u klong snam jong ka Ri Khasi, ka jingdonkam ia ka Dorbar Hima Mylliem, ka daw ka long kat sha ba phai la syrdot u tyllai namar ym shai shuh ia ka nongrim ka Hok ki khun ki hajar, kumba la iateh bad ka Sorkar India.

Lada ym lah ban lum tikna ia ka Dorbar Hima Mylliem, ka paw ba ka don kaei kaei sha lyndet kaban buh ia ka Ri bad ka jaidbynriew kaba kyrpang ha ka jingma kaba khraw khamtam ia ki longdien. Kumta, la kyntu jur ia phi ba phim shim khia ban leh ia kane ka kam ban lum bad khot kyrkieh ia ka Dorbar Hima Mylliem, kaba dei ka pdeng jong ka Ri Khasi ha ryngkat u Khun u Hajar katkum ka Riti dustur kaba ngi dei ban ioh ia katei ka Dorbar Hima Mylliem la kumno kumno shisien shisnem.

 

 

What Next?

Recent Articles

Leave a Reply

Submit Comment
*