Shillong, Risaw 19: Mynta ka sngi u MLA jong ka 19-Shillong South na ka party BJP u bah Sanbor Shullai u la thoh sha u State President jong ka party u bah Ernest Marwei haba u la buh ka jingkylli hato ki nongialam ki tip ia kine ki jingkynnoh jong ka State BJP pyrshah ia ka sorkar.
Ha ka shithi kaba la phah da u bah Sanbor MLA sha u bah Ernest mynta ka sngi u la ong ba la iohi ha kine ki sngi ia ki jingkynthoh kiba la jan man ka sngi na ka party BJP pyrshah ia ka sorkar bad kane kala wanlam ia ka jingbym hun ha ka jingmut jingpyrkhat jong ki briew.
Ka dei ka jingshisha ba ka jingthaw ia ka sorkar MDA ka dei ka trei shitiom jong ki nongialam ka seng BJP ryngkat kiwei kiwei ki party kiba ia don lang ban pynlong ia kane ka sorkar MDA kaba khlain bad ka party BJP ka dei kawei na ki seng sain pyrthie kiba ia don lang ha kane ka sorkar.
Ha ka shithi la thoh ruh ba ha kane ka jingiatreilang ka party NPP bad ka UDP ruh ki dei lang hapoh jong ka Northeast Democratic Alliance ha kane ka thain, kane ka jingpynmih khubor na ka por sha ka por ka buh ia ka jingkylli ia ka rai jong ki nongialama ba ha khlieh jong ka party.
Kane ka jingleh ym dei tang ba ka ktah ia ka sorkar hynrei ka wan ruh ia ka jingthut ha ka jingtrei kam jong ka party namar kum ka kynhun ki juh ia kren ia ki jingeh hapoh ka Coordination Committee ha kaba baroh ki party ki ia don lang ha ka sorkar MDA, namar kine ki jingkynnoh baroh kam shym la wanrah ia ka jingsngewtynnad hapoh jong ka MDA.
Ki jingkynnoh ka long kawei ha ka synshar paidbah, hynrei hap ban don ruh ia ki sabut haba kynnoh, ka jingkylli ka long hato ki nongialam ba ha khlieh jong ka party ki tip ia kine ki jingkynnoh da ki nongialam ka State BJP, lada ka dei ki nongialam ki dei ban kynjoh ktien ruh ia ki MLA kiba la jied da u paidbah.
U bah Sanbor u kyntu ia ki nongialam jong ka party ba lada don kino kino ki jingeh ki dei ban wanrah ha ka jaka iakren khnang ban lap ban ia kren hapoh ka MDA, lada don ki jingeh kiba ym lah ban ia pynbeit dei hangta ki nongialam ba ha khlieh kin tuklar lem.
Kumba ka long u Myntri Rangbah ka jylla u juh kyrshan ia ka party BJP ha kine ki ar snem shiteng wat ha ka por ba ka don ka jingpyrshah ia ka party BJP ha kane ka jylla Meghalaya bad ki ruh ki kyrshan ia u Myntri Rangbah ka jylla u ba dei u Chairman jong ka MDA bad ki don ka jingshaniah ha u kum u nongialam.
Ha ka juh ka por u kyntu ia u myntri rangbah ka jylla ban khot ia ka jingialang jong ka MDA ban ia kren ia ki jingeh khnang ba kan don ka jingiashaniah ha ka jingiatrei kam hapoh jong ka kynhun MDA, la ong ba ka jingong ban weng na ka sorkar kam dei ka bynta jong ki ban ia kren namar kane ka shong ha ki nongialam ka party ba na khlieh bad ka jingkren ha ki lat pathai khubor ka ktah ia ka party kiba ia don lang ha ka sorkar.
La ong ba ia kino kino ki kam dei ban ia kren ha ka jaka kaba dei bad ha ka jingialang kaba la long ha ka 2th Risaw 2020 la shim ia ka rai ba kino kino ki khubor ki ban phah sha ki lat pathai khubor kiba long pyrshah ia ka sorkar dei ban leh ha dien ba la ia mir jingmut bad ki MLA hynrei wat la kala don katei ka rai ki dang mih ki khubor kiba long pyrshah ia katei ka rai.
U bah Sanbor ha ka shithi kaba u la thoh mynta ka sngi sha u President ka party u la ong ba u don ka jingshaniah ha u kum u nongialam hynrei ha ka juh ka por ba un long u ba adkar ha kaba kren sha ki lat pathai khubor ban kren ia ka sorkar kaba ka BJP ruh ka ia don lang, hynrei dei ban ia kren ha ka jaka kaba dei ban ia kren.
