Shillong, Rymphang 10: U bah Snabor Shullai MLA jong ka BJP na 19-Shillong South u la thoh sha u Prime Miniter Narendra Modi ba lada ka sorkar pdeng ka pyntrei kam ia ka Citizenship (Amendment) Bill 2016, yn mih noh na ka party BJP.
U la pynkymaw ruh ha kane ka shithih ba ha ka por ba ka don ka “National Convention” ha madan Ram Lila ha ka 12 tarik jong u kyllalyngkot mynta u snem ba kum ka party na kane ka jylla Meghalaya kala pyrshah ia ka CAB namar kane ka bill kan ktah ia ki trai shnong jong ka dong shatei lam mih ngi jong ka Ri India, kyntup ia ka jylla Meghalaya ruh kum juh.
La ong ba u la rung sha ka BJP da ka jingthmu ban wanrah ia ka roi ka par ha kane ka jylla bad ia ka dong shatei lam mih ngi jong ka Ri India, u la ong ruh ba ha ka jingshisha ia kane ka Bill la don kam ban ia kren bad baroh ki seng sain pyrthei, ki seng bhalang jong kane ka thain shatei lam mih ngi baroh kawei.
Haba ia dei bad kane ka jingpyrshah jong ka party la dep ban kdew shai ha ka dorkhas kaba la dep ban ai namar kane ka Bill ka don shibun ki jingduna namar ia ka la pynshong nongrim halor jong ka niam. Ha ka juh ka por kane ka thian kam don ka jingiada kaba biang ia u pud u sam ha kaba ki briew na Bangladesh kilah ban rung katba mon.
Wat la ka tnad kam poh iing jong ka Ri India kala dep ban pynshai ba ia rai ban ai ia ka jignithuh kum ki nongshong shnong ka shnogn ha ki jylla, kane ka long kaba ym lah ban pdiang namar kane ka poi sha iing bishar bad kan wanrah ia ka jingeh kaba khraw ha dien ha but.
Na ka liang jong u Bah Sanbor u la kren shai ba lada kane ka CAB kan trei kam bad lada yn nym pynlait ia ka dong shatei lam mih ngi un don lynti da kumwei u hap ban mih noh na ka party BJP lem bad ki nongkyrshan jong u.
