Thung hynriew ngut ki ophisar ban pynthikna ha Iewduh ym dei ban pyndon kam pla plastik

Shillong, Nailur 02: Ban sdang ia ka jingpyntrei kam ia ka jingbethah bay m dei ban pyndon kam plastik ha Iewduh naduh mynta ka sngi la sdang da ka jingialang paidbah mynta ka sngi ha Iewduh ha kaba u Executive Member ba dei peit ia ka khaii pateng u Bah Paul Lyngdoh u la pynbna paidbah mynta ka sngi.

Haba kren ha kane ka jingialang, u Bah Paul u la ong ba kane ka jingkhang ia ka jingpyndon kam ia ki plastik kam dei na ka bynta ka jingmyntoi jongno jongno hynrei na ka bynta ka jingkhuid jingsuba jong ka mariang bad ka jingmyntoi lang ia baroh.

U la ong ba u Myntri rangbah duh jong ka Ri India u Narendra Modi ha ka 02 tarik Risaw u bnai ban wan yn sa pynbna paidbah ba la khang ia ka jingpyndon kam Plastik. Ka long kaba biang, ba shuwa ba kane ka jingpynbna kan wan na u myntri rangbah duh jong ka Ri ka KHADC bad ka Hima Mylliem kala sdang.

U la ong ba wat ki ri kiba la kiew ha ka pyrthei mynta ki shem jingeh ban ialeh pyrshah ia ka jingjaboh kaba mih na ki palstik, kumta ngi dei ban sngewthuh ba ka plastik ka dei ka jingma ym tang ia ka mariang hynrei wat ia ki briew ruh kum juh.

U Bah Paul u la ong ba katkum ka Ain Environment Protection Act 1986 ka kumna ka long shilak tyngka lada lap ia kiba pyndon kam plastic, hynrei na ka liang jong ka District Council kam sngewtynnad ban ioh sngew ba la ioh ban dain kumna, kan sngewtynnad lada ka ioh sngew ba ki paidbah ki ia treilang.

Ha kane ka sngi u la pynbna paidbah ba la thung hynriew ngut ki ophisar kiban ia peit ia kane ka kam ban pynthina ba ka Iewduh kam dei shuh ban dang don ba pyndon kam plastic, na kine lai ngut ki dei ki briew jong ka KHADC bad lai ngut na ki ki dei ki briew jong ka Hima Mylliem.

Ha kane ka sngi u la pynbna ruh ba ka KHADC bad ka Hima Mylliem ki dang ia peit iaka jaka na ka bynta ban shna ia ka jaka buh ia ki sla “Cold  Storage” namar lada kam don ka jaka buh kan long ka jingduh ia ki nongrep.

Kiwei kiba la kren ha kane ka sngi ki long u Bah Jambor War EM ba dei peit ia ki Iew ki hat, ha ka jingkren jong u la ong ba kane ka jingleh jong ka KHADC bad ka Hima Mylliem kam dei kaba thymmai hynrei ka dei katkum ki kyndon jong ka ain.

Ha ka jingkren jong u Pa,im Ainam Syiem Syiem jong ka Hima Mylliem u la ong ba na ka liang jong ka Hima kala shah ban pyndon kam ia ki plastik kiba hapoh ka 50 Micron bad kane kan long tang shipor hynrei naduh mynta la khang ia ka jingpyndon ia ki plastic.

 

 

What Next?

Recent Articles

Leave a Reply

Submit Comment

*