Shillong, Nailar 10: U Chief Executive Member (CEM) jong ka Garo Hills Autonomous District Council (GHADC) u Boston Marak, u la leit ban tied ia ka jingkhang jong ka sorkar jylla ba kan iarap pisa na ka bynta ban ioh siew ia ka tulop jong ki nongtrei kiba khlem ioh tulop mynta la khatwei bnai.
Haba kren ha u SP News Agency, lyngba ka phone na Tura, u CEM u la ong ba ka tulop jong ki nongtrei kala sah kut mynta la khatwei bnai bad haba khein lang baroh kala kot sha ka T.40 klur tyngka, haba shim ia kane ka jingkhein, ha ka shibnai ka jingsiew ka long kumba T.4 klur tyngka, ban siew ia kane ka GHADC kala pan boina na ka sorkar jylla na ka khajana kaba dei na ki marpoh khyndew.
Ka sorkar jylla kala pynlait ia ka bhah kaba dei na ki kali bad na ki mar khlaw, hynrei katno kala pynlait ia ka pisa ym lah ban ong namar ba kam pat poi ka jingthoh, hynrei kaba thikna ka long ban a kitei ki ar tylli ki tnad jong ka sorkar kila pynlait ia ka pisa kaba dei jong ka GHADC. Na ka liang jong ka GHADC kala pan T.10 haduh T.15 klur ka boina na ki marpoh khyndew ban ioh siew ia ka tulop jong ki nongtrei.
Ha ka sngi kaba nyngkong kaba u Boston Marak u la shimti ia ka kam CEM hapoh jong ka GHADC, u la ong ba ka kam jong u kaba ha khmat eh ka long ban wad lad wad lynti kumno ban pynioh pisa ban siew ia ka tulop jong ki nongtrei hapoh GHADC bad mynta u la leit ban tied ia ka jingkhang jong ka sorkar jylla ba kan iarap ia ka GHADC.
