Shillong, Kyllalyngkot 18: Ka Meghalaya Pradesh Congress Committee (MPCC) hapoh ka jingialam jong u Takam Sanjoy AICC Coordinator na ka bynta ka jylla Meghalaya mynta ka sngi kila pynlong ia ka jingleit tur ka jong ki sha ka ophis jong ka RBI kaba don ha Cleave Colony Shillong ban pyrshah ia ka jingpynduh noh ia ka pisa lut san spah bad lut ar hajar tyngka da ka sorkar jong u Modi ha ka 8 tarik Naiwieng 2016.
Kumba shispah ngut ei ei ki nongkit kam jong ka party congress mynta ka sngi kila ia lam ha jaka ieng kali ha Dakheti bad ha ka por 11 baje mynstep kila ia iaid sha ophis jong ka RBI kaba don ha kane ka nongbah Shillong bad ai ia ka dorkhas sha u Governor jong ka RBI lyngba ka tei ka ophis.
Ki jingdawa kiba ka seng Congress kala buh ha kane ka dorkhas ka long ba ka RBI mynta ka dei ban ai ia ka hok jong ki paidbah ban sei ia ka pisa jong ki khlem da buh kano kano ka kyndon, ka RBI bad kane ka sorkar jongu Modi ka dei ban pynshai paidbah ia ki jingdawa jong ka seng Congress haka kyrteng jong ki paidbah ka Ri India.
Ha kane ka memorandum la ong ba u governor jong ka RBI, u la pyndem ia lade ha khmat jong ka sorkar u Modi da kaba ai lad ia kane ka sorkar ba kan tuklar ia ki kam jong ka RBI namar ka bor ka shong ha u governor jong ka RBI.
Ka party Congress ka dawa ba u Governor jong ka RBI u dei ban hiar shuki noh shisyndon bad u dei ban shim ia ka jingkit khlieh ha kaba ia dei bad kane ka jingklumar baroh ha kaba pynduh ia ki lut san spah bad lut shihajar tyngka, ia ka burom jong ka RBI dei ban pynneh pynsah kumba ka long.
Ki nongialam jong ka seng Congress kiba la ia shim bynta ha kane ka jingleit kerkut ia ka ophis jong ka RBI kaba don ha Shillong ki long u Bah Ronnie V Lyngdoh, kong Amapreen Lyngdoh kiba dei ki myntri ha ka sorkar jylla, ki la don ruh ki MLA ki MDC bad ki nongkit kam party, la don lang ruh u MLA na Assam u S Husian u ba long u nongpeit pyrman bad shibun kiwei kiwei ki nongkit kam jong ka MPCC.
