Shillong, Risaw 05: Mynta ka sngi u bah Ardent M Basaiawmoit u la pynbna ba la seng ia ka party “Voice of the People’s Party” hapoh ka jingialam jong kum u president ba shipor haduh ban da register ia ka party bad ka Election Commission jong ka Ri India, ia ka jingpynbna paibah kin sa leh na u Naiwieng ban wan.
Haba kren ha ki lat pathai khubor mynta ka sngi ha City Hut Dhaba la ong ba kane kan long ka seng sain pyrthei kaba thymmai ha kane ka jylla Meghalaya ha kaba kin sa ia khun ia ka elekshon ha u snem 2023.
La pynbna ba ki nongkit kam ba shipor jong kane ka seng sain pyrthei kaba thymmai ki long u bah Ardent Miller Basawiamoit kum u President, u Vice President u DR Kara H Shen ,General Secretary Dr Ricky AJ Syngkon ,u Assistant General Secretary Dr Batskhem Myrboh , secretary ban bat ia ka pla pisa u Dr Peter Daniel S Khariong,bad u organising Secretary U bah Winston Tony Lyngdoh bad kiwei kiwei .
Halor ka jingthaw ia kane ka party kaba thymmai u bah Ardent u la ong ba hadien ba ka la iohi ba ka jylla kala dang hiar katba dang mih ki snem wat la ka jylla kan sa kynjoh sha ka 50 snem bad kum ba ka long ki seng sain pyrthei kim shym la lah ban tei kam katkum ka jingangnud jong ki paidbah.
La ong ba ka jingthaw ia kane ka party ka long ban wan rah ia ka jingkylla ha ka shynshar khaddar ha ka ba u la buh ia k jingkyrpad ia ki paidbah ba kin wan ban shim bynta lang ban wanrah ia ka jingkylla ha ka shynshar khaddar bad ban wanrah ia ka jingsynsahr kaba khuid.
La ong ba ki paidbah ka jylla ka don ka jinglynga ka jingpisa, ka jingsngewtieng namar kam don ka jingiaid beit ka ain bad ka jingbam sap ka dei ka daw jong ka jingjot ka jylla kyntu ia ki paidbah ban nym peit tang ia ka pisa ha ka por ilekshon.
Haba ia dei bad ka jingdon ki kam lehnoh ha kane ka jylla la ong ba kan bha ia ka sorkar ban khot iakren ia ki kynhun lehnoh khlem da bun ia kano kano ka kyndon, khot ia kren na ka bytna ban wan rah ia ka jingshong suk shong sain ha ka jylla.
U bah Ardent M Basaiawmoit shuwa ban poi sha ka kam sain pyrthei u la don ha ka seng FKJGP haduh ban da poi ha ka kyrdan president hapoh katei ka seng bad u sa rung sha ka sain pyrthei bad u la jop ia ka MLA nyngkong na ka party UDP ha ka sien kaba nyngkong, ha kaba ar sien u la jop na ka HSPDP bad mih noh na ka party bad mynta seng ia kane ka party thymmai VPP.
