Shillong, Nailar 07: U Bah Hispreachering Son Shylla 66 snem MLA, MDC barim ka KHADC, u la khlad noh mynta ka sngi ha Super Care Hospital Shillong ha dien ka jingshitom kaba la bat ia u katto katne por.
U bah Shylla u sdang kum u nongialam paidbah na ka jingialang paidbah ha Madan Malki u la long u wei na ki nongsain dur ban thaw ia ka sorkar lai lama da kaba kynthup lang ia ka party APHLC, PDIC bad ka HSPDP ban wan rah ia u bah DD Pugh kum u myntri rangbah ka jylla ha u snem 1978 bad ha dien kane u sa resign noh ka kam sorkar kaba u trei ha ophis Accountant General.
Kum u nongmih khmat paidbah u la jop ia ka MLA na ka party Congress ha u snem 1988 ha ka sien kaba nyngkong bad ha ka sien kaba ar u la jop biang kum u MLA ha u snem 1993 na ka seng APHLC (AM) ha kane ka jinglong MLA u la long u myntri ha ka sorkar bad kum u Deputy Sepaker.
Kum u MDC u la jop nyngkong kum u MDC ha u snem 1984 na ka Nongkrem konstitwensi bad ha kane ka jinglong MDC u la ong u EM, ha u snem 2004 u la wan phai biang kum u MDC na Laitkroh Konstitwnesi bad dei ha kane ka snem ba u la ioh ban long kum u CEM ha u snem 2005 haduh 2008.
Ka jingwan phai biang jong u KUM u MDC ka dei na ka ilekshon MDC shiteng samoi ha u snem 2016 Nohprah na Nongkrem bad ha u snem 2018 u la ioh ban bat biang ia ka kam CEM haduh ban da poi ka ilekshon ba thymmai.
U bah Shylla wat ha ki por ba u khlem nongmihkhmat paidbah, hynrei u la trei la ka kam na ka bynta ki paidbah ka jylla khamtam ia ka Ri Lum Khasi dei u bah Shylla u ba la seng ia ka Synjuk ki Rangbah kur, ha duh ka khyllip mat ba un sa khlad na kane ka sla pyrthei u don kum u Chairman ka Sur u Paidbah 7 Trep bad lyngba kane ka kynhun u la kdew lynti bun ki kam kiba ka sorkar kala pdiang ha kane ka jingiakhun pyrshah ia ka khlam COVID.
