Shillong, Nailar 28: Ka jingialang kaba palat spah ki nong nongkryshan ha ryngkat ki dkhot ka Nongkrem Block Congress Committee, ba la khot da u Bah Lamborsing Nongrum (Bah Lead) na Nongkrem ka la long por 10.30 mynstep, ha ka 26 tarik August 2017, ka la long ha iing Dorbar Hall Nongkrem (Iewpyrsing) ban ia kren halor ka MLA Election 2018.
Hadien ka jingiakren kaba sani bha halor ka Election MLA 2018, bad khamtam haba la ia kren halor ka MDC Nongkrem Bye Election kaba dang shu dep ha kaba u kyrtong Congress u la wan ba ar bad ioh 4198 vote bad ki jingia jingmut na kyllen ka 22-Nongkrem Assembly Constituency, katei ka jingialang ka la pdiang ia ka jingtyrwa jong u Bah Lamborsing Nongrum, ban kyrshan ia u Bah John F Kharshiing, President, Nongkrem Block Congress Committee, kum u kyrtong MLA 2018 ba un mih bad ban thep kyrteng na ka Seng Congress.
U la pynpaw ba ka jingiatrei shitom u Bah Deng John Kharshiing, bad ka jingiatrei lang ryngkat ka jingtrei shitom ha ka MDC bye election 2017, kaba dang shu dep kan sa sei soh bad kan sa wanrah ia ka jingkyrmen ia ki paidbah Nongkrem Constituency baroh kawei namar mynta ki paidbah ki la kwah hir hir da u ba thymmai. U la pynpaw ba u Bah John F Kharshiing u la kit ia ki kam treimon sngewbha khamtam kum u Chairman ki Khlieh Nongsynshar bad ruh kum u khlieh duh kum u Workiing President ka Meghalaya State Olympic Association ha ka Sports.
Na ka liang u Bah John F Kharshiing, u la pynpaw ia ka jingsngewnguh ia u Bah Lamborsing Nongrum, uba la pynpaw shisha ia ka jinglong rangbah ha ka kam sain pyrthei namar kham iar ban ioh sngew ia ka jingialang ban khot ki nongialeh election ba kin lum jingialang na kabynta ban pynbna bad kyntu ia ki nongkyrshan lajong ban kyrshan ia kiwei.
U la ong ba u dap da ka jingsngew rit halor kane ka jingtyrwa bad ka jingpynpaw ia ka jingkyrshan kaba shitrhem, bad u la ong ba u la iai trei paidbah la bun bun snem haduh kine ki sngi, bad u la Khot ia ki paidbah baroh ban trei shitom ban ioh ia ka jingkylli hapoh ka Nongkrem Constituency baroh kawei. U la pynpaw ba ka Kam MLA bad ka Kam MDC ka long kaba khia. u la ong ba ka Nongkrem Constituency ka dang long ka Constituency kaba duna ha kiba bun ki Liang naduh ka koit ka khia, ka surok synkien, ka umbam umdih, ka rep ka Riang, ka pule Puthi, ka ioh Kam ioh jam, ka bording, ka Iew ka hat, bad khamtam ha ka Liang ki jaka kilan met (Sports), ka Kam jngoh Kai bad kiwei kiwei.
U la pynpaw ruh na ka por ka dawa ban ioh ki MLA ki ban rah ia ka jingiakren hapoh Assembly ban shai ka hok ka kyrdan ki Dorbar kur Dorbar Shnong, Raid haduh Hima katkum ka Instrument of Accession bad Annexed Agreement 17 Aug 1948, khnang ban shai kumno ki Ain kiba pher bapher kin ia trei kam bad ki bor Shnong, Raid bad Hima.
U la pynkynmaw ba u la ialeh teng na nongkrem ha u snem 1998 ha ka por ba u bah H S Shylla, u la ieh noh ia ha kam Sain pyrthei, bad ha kaba u la long uba ar hapdeng ka jingmih ka jingioh ticket kaba tang 17 sngi bad ha kaba ka Nongkrem Constituency ka la thaw history ha ka jingmih haduh 14 ngut ki kyrtong.
Kum shi bynta ban nang pynkhlain ia ka Nongkrem Block Congress Committee, u Bah SG Khongiong, General Secretary, East Khasi Hills District Congress Committee, (EKHDCC), u la pynskhem ia ka jingtyrwa Jong ka iing ia u bah lamborsing Nongrum, kum u Working President, jong ka Nongkrem Block Congress Committee (NBCC). U bah Khongiong, u la pyntip ba ka MPCC ka la buh por 15 sngi naduh 31 Aug 2017 ia kiba kwah ban shim ia ka form na ka bynta ka Election MLA 2018, bad hadien Kane ka MPCC election committee Kan sa shim ia ka rai kaba khatduh halor u kyrtong.
Ha katei ka jingialang kiba la kren bad kiba la ia don lang ki long Kong Katherine Marbaniang,General Secretary State Mahila, Bah S G Khongiong, General Secretary , EKHDCC, Kong New Ryndong, District President, Mahila EKH Kong Mary Ann Poshna, General Secretary, Nongkrem Block Congress Commitee, Bah Rupert Lyngdoh,General Secretary NBCC, ha ryngkat ka jingdon ki Rangbah ki Longkmie na ki Shnong ka thain bapher bapher.
