Shillong 16 Naitung: U Bah Lamiki Khongdkhar u la shah jied kum u sordar ba thymmai jong ka shnong Raid Mawshun da kaba pynliem ia u kyrtong u Bah Joy Khongmawloh na da 145 vote ha ka jingjied kaba long ha kane ka sngi Saitjain.
U Bah Lamiki u la ioh 717 vote katba u Bah Joy u la ioh 571 vote bad u Bah Dapkupar Tariang u ioh 116 vote. U Chairman ka Election Committee u Bah Hilarius Pyngrope haba iakren mynta ka sngi, u la iathuh ba ka elekshon ka long kaba iaid beit iaid ryntih khlem kano kano ka jingthut.
La niew ia ki vote ha ki saw tylli ki jaka thep vote katba ia ka result la pynbna ha shnong Pomshutia kaba dei ka jaka treikam jong kane ka Raid ba la sakhi lang u ADC, ki pulit na Pynursla bad kiwei.
U Bah Pyngrope u la iathuh ba ia kane ka elekshon la pyniaid hi da ka Saw Raid katkum ka ain ba la thaw da ka District Council bad yn shu phah ia ki jingtip sha ka Council, bad kiwei ki bor.
Ki don saw tylli ki jaka thep kynthup ha Nongthymmai, Lapalang, Pomshutia bad Mawshun. Ia ka jingioh vote jong ki kyrtong ruh yn niew noh ha kato ka sngi hi bad yn pynbna ha Pomshutia, la ong u Bah Pyngrope.
