Shillong, Risaw 24: U khun jong u Bah Kitdor Syiem bam kwai ha dwar u Blei u Bah Lawanpynshngain War un long u kyrtong jong ka party National People Party (NPP) ha kane ka Election MLA ha u snem 2018 na ka Mairang Constituency.
Ka jingmih sha khmat jong u Bah Lawan ka long ha dien ba la peit ia ka jinglong ka roi ka par hapoh jong ka Mairang Constituency ha dien ka jingbym don shuh u kpa kala sah shrah ha baroh ki liang ha kaba ia dei bad ki kam pynroi.
Ha dien ba la ia shong pyrkhat kum ka iing lem bad ki riew rangbah la shim ia ka rai ba un mih madan ban ia khun ia ka MLA Election na ka bynta ban bteng ia ki kam kiba u kpa u la prat lyngti na ka bynta ka roi ka par hapoh jong ka Mariang Constituency.
Ban pynkynmaw u Bah Kitdor Syiem u la long u MLA jong ka Mairang Constituency bad u la long ruh u kabinet Minister hapoh jong ka sorkar jylla na ka seng Congress, hynrei ha kane ka jingia mih madan jong u Bah Lawan na ka seng NPP ka long haba la peit ia ka jinglong jong ka seng Congress ha kane ka por ba mynta kam long shuh kum ka congress ha katei ki por kiba mynshuwa.
Kumba ka long na ka liang jong u kpa jong u, u Bah Kitdor u la sain dur ban pynlong ia ka Mairang ka pdeng na ka bynta ka West Khasi Hills ha ki liang baroh bad kane kala sah kut mynta, ia ka West Khasi Hills baroh kawei kaba dang don kam ia shibun ki kam pynroi ha baroh ki liang.
Ha ka jingiohi ka jong u Bah Lawan, ka jingnang jingstad ka long kawei na kiba kongsan kaba lah ban wan rah ia ka roi ka par ha ka dong bad ka thain, ban pynurlong ia ka ne ka jingthmu u la long u nongseng ia ka Khatsawphra College kaba don mynta ha Mairang, Ka jingiohi ka jong u ka long ba haba ka don ka jingnang jingstad ka roi ka par ruh ka iaid ryngkat ryngkat.
