Shillong, Jymmang 18: Ha ka jingkren ha kaba ai Sanad ia u Lyngdoh jong ka Hima Mawphlang mynta ka sngi u Chief Executive Member jong ka Khasi Hills Autonomous District (KHADC) u Bah Titosstarwell Chyne u la kren shai ba u bah Pyniaid Sing Syiem un dei u Chairman ban sa wan hapoh jong ka KHADC.
Da kane ka jingpynbna jong u CEM jong ka KHADC mynta ka sngi kala paw shai ba kane ka EC jong u Bah Chyne kan wan rah ia ka “Resolution” ha ka dorbar mang tyngka kan ban sa long u bnai Jylliew ban wan jong ka KHADC.
Kane ka Executive Committee jong u Bah Chyne kala paw shai ba kan weng ia u bah PN Syiem na ka kam Chairman kaba u dang bat mynta kum u Chairman jong ka KHADC. Ka dorbar mang tyngka jong ka KHADC kan sa shong ha u bnai jylliew ban wan.
Katkum ka AD Rule jong ka KHADC, ban weng ia u Chairman jong ka iing dorbar ka hap ban wanrah ia ka Resolution hapoh ka iing dorbar na ka liang jong ka EC ne na ka liang pyrshah bad lada ka liang kaba wan rah ia ka resolution kan jop, kata ka long ba u Chairman u hap ban hiar shuki.
