Shillong, Kyllalyngot 15: U Bah Donkupar Sumer MDC jong ka Umsning u la kynnoh ba u bah Pynshngianglang Syiem CEM jong ka KHADC u dei u Mukul Khasi, ia kane u la kren ha ki nongthoh khubor mynta ka sngi ha Shillong Press Club.
U bah Donkupar u la ong ba u CEM jong ka KHADC u la sam work order hapoh Umsning Constituency sha ki briew jong ka PDF. La ong ba baroh ki work order kiba u la sam khlem ka jingtip ka jong u kila kot sha ka 19 tylli ia kane la leh khlem ka jingtip ka jong u.
U bah Donkupar u la ong ba u bah Pynshngianglang u la leh don bor hapoh jong ka KHADC da kaba pyndon kam bakla ia ka ophis jong u CEM na ka bynta ka jingmyntoi jong ka party PDF, u CEM ka KHADC u la kynnoh ba u Dr Mukul u leh don bor, hynrei ha ka jingshem jong u ba u Bah Pynshngianlang u dei u Mukul Khasi.
U la ong ba kila ngiah ia ka jingleh don bor jong u CEM ka KHADC, u la ong ba kum kane ka jingleh kam dei tang hapoh Umsning Constituency hynrei sha kiwei ruh hynrei kaba u kren u kren tang ia ka jaka kaba u mih khmat.
U la ong, Kumba ka Congress kala pyndon kam ia ka Life stock Mission kum ka Congress party fund, u Bah pynshianglang ruh u la pyndon kam ia ka pisa special Assistance ba ai ka sorkar sha KHADC kum ka party fund jong ka PDF. U bah Donkupar Sumer u la ong ba yn nym shong kli kti um bud dien ia kane ka kam bad ka District Council Affair jong ka sorkar jylla.
