U bah Pynshngianglang Syiem un long u kyrtong Myntri Rangbah ka party PDF 2018

PDF rallyShillong, Nohprah 19: Ka party People Democratic Front (PDF) mynta  ka sngi ka la pynbna ba u Bah Pynshngain N Syiem kum u nongialam jong party bad ba un long u kyrtong myntri rangbah jong ka seng ban ialam ia ka sorkar kaba thymmai lada ka wan ha ka bor synshar hadien ka jingjied nongmihkhmat sha ka iingdorbar thawaiñ ha u snem 2018.

Ia kane la pynbna ha ka jingialang paidbah kaba la long mynta ka sngi ha Madan Polo, ha dien ba u Bah PN Syiem MLA barim jong ka Mawsynram u la pyniasoh pura bad ka party PDF mynta ka sngi u ba dei ruh u CEM hapoh jong ka KHADC, ha kaba da ki hajar ngut ki paidbah kila ia poi sha kane ka jingialang ban pdiang burom hapoh jong ka seng PDF.

Ha kane ka sngi la thung ruh ia u Bah PN Syiem kum u Chairman jong ka People Democratic Front (PDF) na ka bynta ban pyniaid shakhmat ia ki kam bad ruh ban ialam ia ka party sha ka thong jong ka jingjop ha kane ka ilekshon MLA ka ban long ha u snem 2018.

Na ki 36 tylli ki constituency ha rilum Khasi bad Jaintia, ka PDF haduh mynta ka dang pynbna ia ka kyrteng jong ki 22 ngut ki kyrtong ki ban iakhun ha kane ka ilekshon bad la sngewthuh ba shen kan sa pyllait shuh ia ka kyrteng jong ki kyrtong kiba dang sah.

Haba kren ha kane ka jingalang paidbah  u Bah Syiem u la ong ba ki jingpyrshang kiba bun rukom ba la pyndonkam da ka Sorkar Meghalaya United Alliance (MUA-II) ba la ialam da ka Congress ki la pulom lut halor ka jingthmu ban pynhap ia u bad ruh ia ka People’s Democratic Forum (PDF) kaba synshar hapoh KHADC.

“Ia ka jingialeh ka jong nga bad ka Congress lah ban shim kum ka jingialehkai phutbol hapdeng ka MUA Football Club pyrshah ia ka PDF Football Club. Ki la pyrshang ia baroh ki lad ki lynti hynrei ki la pulom lut ha ka jingpyrshang ka jong ki namar ba ki la shah rem ha ka kynhun jong ka PDF,” u la ong.

U la pynpaw ia kane da kaba kdew ha kaba iadei bad ka jingwanrah kyrkieh ia ka aiñ Prevention of Disqualification (Members of Legislative Assembly of Meghalaya) (Amendment) Act, 2015 da ka Sorkar Jylla da kaba ong ba la shna ia kane ka aiñ da ka jingthmu ban pynkut ia ka kam sain hima sima jong u.

Lah ban pynkynmaw ba napdeng ki phra ngut, haduh 7 ngut ki MLA na ki seng saiñ pyrthei kiba pher bapher ki la hiar noh na ka shuki MDC jong ka Khasi Hills Autonomous District Council (KHADC) bad Jaintia Hills Autonomous District Council (JHADC) namar ka jingtieng ioh shah mait kyrteng.

Hynrei tang u Bah PN Syiem u la long u MLA, uba la rai ban iakhun pyrshah ia kane ka jingthmu jong ka Sorkar da kaba bteng ia ka kam MLA bad MDC haduh ban da ioh ia u soh jong ka jingjop hadien ba na ka liang jong ka ïingbishar Meghalaya High Court ka la pynkut noh ia ka PIL kaba la ujor ban mait kyrteng ia ki MLA kiba bat ruh ia ka kam MDC, halor ka hukum jong u Lat kaba la pynksan ba ka kam MDC kam don jingiadei eiei bad ka Sorkar Jylla.

Ha kane ka jingialang paidbah,u Bah Syiem u la ther tyngeh ruh ia ka Congress kaba bat ia ka synshar lakam hadien ba ia ka aiñ Meghalaya Parliamentary Secretaries (Appointment, Salaries, Allowances and Miscellaneous Provisions) Act, 2005 ruh la pyndam noh da ka ïingbishar Meghalaya High Court kaba la lam pat sha ka jinghiar shuki ba shimiet shimiet jong ki 17 ngut ki Parliamentary Secretary.

Ha kane ka jingialang paidbah u la kynthoh ruh ia ki nongialam seng sain pyrthei bapher bapher, halor ka jingbym lah ka jong ki ban pyndep ia ki jingkular, u Bah Syiem u la ong, “Bun ki MDC ba kynthup ia u Bah Ardent M Basaiawmoit, Bah Metbah Lyngdoh bad kiwei kiwei ki la hiar shuki wut wut namar ka aiñ bam ar maloi ba la wanrah da ka sorkar jylla tang namar bym sngewthuh ia ka aiñ, te kumno pat ki nud bad kop ban shna ia ki aiñ ban iada ia u paidbah ka jylla.”

U la  kyntu ia ki paidbah ba kin bishar bniah bad ai ia ka rai kaba dei ha kane ka ilekshon MLA ka ban long ha u 2018 ryngkat bad ki mat treikam jong ka PDF halor ka phang “Mynta ne Lano Pat”, u la ong ba ka thong jong ka PDF ka long ban shna ia ki ain katkum ka jinglong jong ngi ha kane ka shnong, bad ban wanrah ia ki polisi bapher bapher, lada wan ha ka bor.

Ka  jingthmu bahakhmat ka jong ka PDF ka long ban wanrah ia ki aiñ ki polisi treikam ki ban iadei dur bad ka jingdonkam ban iada ia ka ri bad jaidbynriew jong ka jylla, u la ong bad pynkynmaw ba ia ka PDF la seng hadien ba ka jylla ka la mad bad sakhi ia shibun ki jingeh ha ka jingiaid lynti hapoh ka jingsynshar jong ka Congress.u snem 2018 yn sa pyni ia ka lawei jong ka jylla u la kyntu ia ki paidbah ba kin ai ka jingkyrshan pura ia ka PDF.

U la kynnoh ruh ba ka seng Congress lem bad kiwei pat ki seng saiñ pyrthei kum ka Hill State People Democratic Party (HSPDP) bad United Democratic Party (UDP) kim shym la lah satia ban pynurlong ia ka jingkular ka jong ki, wat hadien ba la ioh ia ka jylla mynta la 45 snem, ha kaba kim shym la lah satia ban shna ia ki aiñ ki ban iada ia ka ri bad ka jaidbynriew.

Ha kane ka sngi na ka liang ka PDF ka la pyllait paidbah ruh ia ki 16 tylli ki mat treikam kiba hakhmat ba kynthup ban wanrah ia ka sorkar kaba lait na ka jingbamsap, ban pynkhlaiñ ia ka Sixth Scheduled jong ka Riti Synshar ka Ri bad ruh ban pynkup bor ia ki rangbah shnong lyngba ki aiñ, ban thaw ia ki aiñ na ka bynta ki nongrep, ki nongbylla sngi, ban ialeh ruh ha kaba iadei bad ka jingeh jong ka ioh kam ioh jam bad kiwei kiwei.

Ha kane ka sngi, ka PDF ka la pyllait paidbah ia ka ‘theme song’ ne ka jingrwai jong ka party, ia ka slogan ne ka byrta jong ka party, ia ka Leaflet. Ki nongialam ka PDF ha kane ka sngi ki la pynithuh ruh sha ki paidbah ia ki kyrtong jong ka, kiba la iadon lang ha kane ka sngi ba kynthup ruh ia ki ar ngut ki longkmie, Kong Grace Mary Kharpuri (MDC) bad Kong Sarita Lyngdoh Nongpiur, kurim jong u Bah Founder S Cajee (bam kwai ha dwar U Blei).Ia kane ka sngi la pynphuh pynphieng ruh da ki jingrwai bad jingshad na ki kynhun kiba pher bapher bad la ioh jingkren ruh na ki nongialam ka PDF jong ka Central Youth Front Bah Hamlet Dohling, President Women’s Front Kong Grace Mary Kharpuri lem kiwei kiwei.

 

 

What Next?

Recent Articles

Leave a Reply

Submit Comment

*