Jowai, Risaw 04: Hadien ba u Bah M H Dkhar, Founder President jong ka seng All Jaintia Youth Welfare Organisation Central Body, ha ka Central Executive Council jong ka seng kaba la long mynhynnin ka sngi, u la shim ia ka rai ban shong shongthait noh na ka kam nongialam jong AJYWO.
Ka eng mynhynnin hi ka sngi, ka jied noh ia u Bah Reachingson Siangshai kum u President ba thymmai lem bad ia u bah Bah H. Deolangki Dkhar kum u Secretary General ba thymmai jong ka. Kiwei pat ki nongkit kam jong seng la pynneh ia ki kumba ki long. La pynskhem ia kitei ki jongialam ba thymmai jong ka seng ha katei hi ka sngi da u Bah M H Dkhar hi.
Ha katei ka juh ka sngi, la pynskhem ruh ia ki nongialam ba pura jong ka jong ka AJYWO East Jaiñtia Zone, kata, ia u Bah Kd. Heatermoon Ryngkhlem kum u President bad ia u Bah Embok Dkhar kum u General Secretary jong katei ka shnat trei kam jong ka seng, katba kiwei pat ki nongkitkam ki neh kumhjuh hi.
U Bah M H Dkhar haba ai jingkren ha katei ka sngi, u la kyntu jur ia kitei ki jongialam ba thymmai jong ka seng, ba kin trei shitom, trei hok da ka jingiatylli bad ka jingieit ha ka ban ialam ia ka seng sha khmat ha ka ban ai ia ka jingshakri kaba bha tam ia ka ri bad ka jaidbynriew.
Ha katei ka jingialang, u Bah Reachingson Siangshai, haba kren kum u President ba thymmai jong ka AJYWO Central Body, u la pynpaw ia ka jingsngewnguh ia ki para dkhot jong katei ka seng, kiba la ibit ia u ban ialam ia ka seng.
U Bah Siangshai u la ong ruh, ba kum u nongialam ba thymmai, un iai buddien ia ki mat (issue) kiba dang sah teng jong ka seng, ha ryngkat ka jingkular jong u, ba un trei shitom met bad mynsiem da ka jingkhuid katba lah ei ha kaban pyntyllun ia ka shalyntem jong ka seng sha khmat ha kaban ialeh ban ai ia ka jingshakri kaba bha tam ia ka ri bad ka jaidbynriew.
Ha katei hi ka jingialang, ki nongialam ba thymmai jong ka seng, ki la pynpaw ruh ia ka jingsngewnguh ia u Bah MH Dkhar ba, kum u nongialam barim jong ka seng, u la trei ia kiba bun ki kam na ka bynta ka jong ka ri bad ka jaidbynriew bad ruh ki la kitbok kit rwiang ruh ia u, ba U Blei un kyrkhu ia u, khnang ba un ioh ia met kaba koit ka khiah bad ruh roi kyrhai ha baroh ki liang ka jingim jong u.
