Shillong, Jymmang 27: Ka long ka jingsah kynmaw hapoh ka history jong ka Khasi Hills Autonomous District ba mynta ka sngi ka dei ka sien kaba nyngkong eh ba u Myntri Rangbah ka jylla u Conrad K Sangma un leit ban peit ia ka iing dorbar ka District Council ha ka por ba ka dang don ha pdeng ka dorbar.
Ha kane ka jingwan jong u Myntri Rangbah ka jylla ban peit ia ka jingpynlong dorbar hapoh jong ka KHADC la pynshong ia u ha ka Official Gallery bad u myntri rangbah u la shong kumba 15 minit ei ei ban peit ia ka jingia kren ki MDC hapoh ka iing dorbar ban ai khublei ia u lamphang ba dang shah jied thymmai.
U Bah Pyniaid Sing Syiem Lamphang ka KHADC haba kren ai khublei ia u myntri rangbah ka jylla u Conrad K Sangma u ba la wan ban sakhi ia ka jingpynlong dorbar hapoh jong ka KHADC, u la ong ba kam pat don kano kano ka jingthoh hapoh jong ka District ba u myntri rangbah ka jylla un wan ban jngoh bad kane ka dei ka sien kaba nyngkong eh ba u myntri rangbah ka jylla un wan ban peit.
La ong ba kumba ka paw naduh bala sdang ia ka District Council ha u snem 1952 bad la ioh ia ka jylla ha u snem 1972, ym pat don myntri rangbah na ka jylla ban wan peit ia ka jingia shong dorbar hapoh jong ka KHADC bad mynta ka dei ka sien kaba nyngkong ba u myntri rangbah ka jylla un wan ba sakhi ia ka jingiashong dorbar ha KHADC.
Ia u myntri rangbah ka jylla la leit ban pdiang sngewbha da u CEM jong ka KHADC ha phyllaw ryngkat bad ki EM bad la ialam ia u sha iing dorbar namar ka iing dorbar ka dang iaid ha kane ka por la pynshong ia u Myntri Rangbah ka jylla ha Official Gallary bad u mytnri rangbah u la shong kumba 15 minit ei ei bad u sa leit noh.
