Shillong, Risaw 18: U Myntri ka tnad ka koit ka khiah jong ka sorkar jylla u ba dei u khot jong ka Governing Council jong ka NEIGHRIMS u Bah AL Hek u la ong ba ka jingialang jong ka “Governing Council” ba dei peit ia ka NEIGHRIMS ha ka jingialang kaba la long ha ka 15 tarik mynta u bnai ha Delhi kala shim ia rai ba u Dr DM Thapa Director u hap ban leit na katei ka Hospital.
Haba kren ha ki lad pathai khubor mynta ka sngi u myntri ka koit ka khiah jong ka sorkar jylla u la iathuh ba ha katei ka jingialang jong ka Governing Council kala bethah ia u Director ka NEIGHRIMS ba u dei ban resign na ka kam, lem kumta un transfer ia u na katei ka hospital kata ka long kaba shai.
Ia kane ka jingialang jong ka Governing Council la pyniaid da u myntri ka sorkar pdeng ba dei peit ia ka koit ka khiah u Harsh Vardhan ha kaba baroh ki dkhot kila ia don lang bad baroh kila shim ia kawei ka rai ba dei ban weng ia u na katei ka Hospital bad ka daw ka long ba mynta ar snem ym shym la khot wa tang kawei ka jingialang ban ia kren ia ka jingpynbha ia ka Hospital.
Haba ia dei bad ka jingkynnoh jong u Director ka NEIGHRIMS ba ki politician kila shah thied, na ka liang jong u Bah Hek u la ong “Ngam shym shah pynbam pisa”. Haba ia dei bad kiwei ki jingkynnoh u la ong ba kita kidei ki kam poh iing jong ka NEIGHRIMS un lah ban ong ei ei.
Kaei kaba ka sorkar ka kwah ka long ba kane ka jaka sumar ka dei ban long kaba iaid beit bad kine ki jingialeh politic hapoh jong ka Hospital ka dei ban kut noh mar dor bad ha ka jingshisha ka la dei ban kut na duh mynno hi ruh, la ong u bah Hek.
