Shillong, Nohprah 22: Ka KSU ka sngew thamula halor ka jingkren u Lat barim ka jylla ha kaba ia dei bad ka CAA bad ka ILP. U RS Mooshahary ha ka jingkren ka jong u, u la ong ba ka CAA kam don jingktah ia ka thaiñ shatei lam mihngi bad ia ka jylla Meghalaya. Shuh shuh u la ong ba ka ILP kam donkam ha jylla Meghalaya namar ba la don ka 6th schedule bad ba kan ktah ia ka roi ka par.
Ka seng halor kane ka phang ka sngew ba kynthoh halor ka jingkren jong u kaba pyni ba um don jingtip ne jingsngewthuh eiei ruh em halor ka ka long ka man jong ka jylla bad ki Jaidbynriew trai ri trai muluk. Shuh shuh ka kdew ruh ba lyngba ki kyntien ki jong u, u long kum u dalal ka sorkar pdeng bad jong ki mynder ri kiba wan buhai shnong ha ka thaiñ shatei lam mihngi.
Ka KSU ka pyrshah jur ia ka CAA namar kan plie ia ki khyrdop ban ailad ia ki khar Bangladeshi Hindu ban rung suk sha ka thaiñ shatei lam mihngi bad ha jylla Meghalaya. Shuh shuh ka jingbuh cut off year ia ka CAA ka long ka bym lah da leilei ruh em ban pdiang da ka seng namar katkum ka kyndon jong ka CAA ka ong ba ia kito kiba la rung tuh ha India naduh shwa u 2014 kin ioh long nong India ba pura.
Hynrei ka seng naduh ba la pynkha ia ka, ka dawa ba ka cut off year ka dei ban long beit ha u snem 1971 khnang ba yn lah ban kyndang lut ia kito baroh ki ba wan rung beaiñ hadien utei u snem namar lada u cut off year un dei u snem 1971 ka mut ka jingpynher krad ia ki mynder ri ba ruh kan long kaba seisoh ha kaba yn ioh biang ia ki jaka Khasi kiba la duh ha ka jylla sha kine ki poiei.
Shuh ha kaba ia dei bad ka ILP bad ka 6th schedule, ka seng ka sngewdei ban kynthoh ba lada ka 6th schedule ka lah ban iada ia ki rit paid trai ri trai muluk kumno pat ba naduh ba la pynkha ia ka ha u snem 1952 kam lah ban teh lekam katkum ka jingangnud u paid bah bad ki sengbhalang ki hap ban iakhih beh mynder tad haduh kane ka khyllipmat kaba mynta.
Ka seng ruh ka sngewdei ban ong ba ia kata ka jinglong ‘mainstream’ kam mut ba ngin hap ban ia peiñ noh ia ka hok longtrai ha ka khyndew ka shyiap, ka riti ka dustur, ka kamai kajih bad ka synshar ka khadar. Ka jingwanrah ia ka ILP kam mut ba ngin ker kut ia lade baroh sawdong da ki kynroh ba jrong, hynrei ka mut ban ker ia lade da ki kynroh kiba don ki jingkhang ban rung ban mih da ka aiñ ym ban shu rung pathar.
Ka jingpyntreikam ia ka ILP kam mut ban pynduh ia kata ka jinglong ‘mainstream’ hynrei ka mut ban ailad ia ki rit paid ba kin ia ryngkat kyrdan bad kiwei ki jaitbynriew kiba heh paid bad lyngba kane ka jingryngkat kyrdan jong baroh ka mut kata ka kyntien ‘mainstream’ kan sa urlong.
Ban bynrap shuh shuh ka mut ba lyngba ka ILP ka hok jong ki Jaidbynriew rit paid ha Meghalaya kan ym shah ktah bad kan iarap ia ki ha kaba ki kyntiew ia lade ym shuh ban hap shu iakhun beit ha surok ban dawa ia ka hok longtrai bad jingshah ban beiñ.
Kan bha shibun ia u lat barim ba un leh homework shwa ha kaba ia dei bad ka history ki trai ri trai muluk ha jylla Meghalaya bad ka thaiñ shatei lam mihngi bad kan bha shibun ia u ban leh eiei shwa halor ka jingshah buhai shnong ki shnong Bodo kiba dei na ka Jaidbynriew ka jong u ha Assam ha shwa ba un tuklar ia ka Meghalaya.
