Shillong, Jylliew 08: U Lat ka Jylla, u Tathagata Roy mynta ka sngi u la plié ia ka integrated online portal
learn.rkmshillong.org jong ka Ramakrishna Mission Vivekananda Cultural Centre.
Kane ka portal ka dei ba la shna hi da ka RKM bad ka pyndonkam ia ka model hybrid ban pyniasoh bad ki samla pule lyngba ka internet bad ka ailad ia ki ba kin ioh iakren bad ki nonghikai ryngkat bad katto katne ki kam ba ioh khlem da donkam ka internet.
Da kaba pyndonkam ia kane ka portal ki jinghikai computer bad ki jinghikai ia ki ktien bapher bapher ki lah sdang biang naduh ka 8 tarik u Jylliew, 2020. Kane ka portal ka plié lad ruh ia ki samla pule ba kin ioh jinghikai ha ka Yoga, Values Education, Personality Development bad bad dro dur.
Ha kajuh ka por, lah plié ruh ia ka lad ban ioh jingsyllok kaba tip kum ka Manodarshaniahm ha kaba ki samla pule ki ioh jingsyllok khlem da donkam siew eiei na ki riew shemphang ha kaba iadei bad ka jingioh kam bad ki jingeh ba ki iashem shimet.
Ha kaba plié ia kane ka portal, u Lat u la ong, “Mynta ka lah dei ka por ba ngin plié ia ki rukom ai jinghikai. Kadei kaei kaei kaba khraw ba ka Ramkrishna Mission ka dei ka nong ialam lynti ha kane ka kam.”
Ha ka jingai jingkren jong u, u Swami Sarvabhutananda uba dei u Secretary jong ka Ramakrishna Mission, Shillong, u lah kren shaphang ka jingai jingsyllok ia ki samla pule.
“Bun ki khynnah kiba ioh jinghikai hangne mynta ki shem jingeh bha namar kane ka khlam bad kine ki jingeh ki long kiba bun jait. Kaba donkam bha mynta ka dei ban don ka rynsan kaba ailad ia ki ba kin ioh iakren bad ki riew shemphang khnang ba kin ioh jingmut kiba biang.”
