Shillong, Rymphang 04: Ka jingiakhih ba san sngi jong ka COMSO ban dawa ia ka Inner Line Permit na ka sorkar pdeng kala sdang mynta ka sngi ha phyllaw jong ka State Central Liberary ha kaba palat spah ngut ki dkhot ki riew paidbah kila wan ban ia shim bynta kyntup ia ki rangbah bad ki long kmie.
Haba kren ha ki lad pathai khubor u Bah Roykupar Synrem, u la ong ba ha ka jingshisha u myntri rangbah ka jylla u Cornad K Sangma u al dei ban ialam ia kane ka jingdawa ILP kumba u la leh ha ka por ba u pyrshah ia ka CAB ha u snem 2018 kaba mynta kala kylla ka CAA.
U Bah Synrem u la ong ba kam biang tang ban shu pdiang ia ka rai hapoh iing dorbar ban pyntrei kam ia ka ILP lada ki nongmih khmat jong ka jylla baroh 60 ngut kim ia khih ban leit ban dawa na ka sorkar pdeng ban pyntrei kam ia ka ILP ha kane ka jylla.
U Boby Basaiawmoit General secretary jong ka HANM u la ong ba kum ka kynhun hapoh ka COMSO ba lada ka sorkar kam sngap ia kane ka jingdawa kaba kila sdang da ka jigniakhih kaba jai jai kin sa ia kynduh biang kum ka kynhun na dang pynjur shuh shuh ia ki jingiakhih.
U Balkarin Ch Marak nongkhot ia ka All Garo Hills Joint Action Committee, u la ong ba ka jingdawa ban ioh ia ka ILP hapoh jong ka jylla Meghalaya ka long kaba don nongrim ban ioh ia ka jingiada na ka jingwan jong ki briew kiba na bar, u la ong ba kane ka sorkar NPP bad baroh ki MLA ki dei ban ia treilang ban pynioh ia ka ILP ha ka jylla Meghalaya.
