Shi
llong, Risaw 03: Ka dorbar ba nyngkong jong ka “Khasi Council of Traditional Chief and Headman” ha kaba ki Syiem, Sirdar, Wahdadar , ki myntri, ki sordar shnong bad ki Rangbah shnong kiba hap hapoh jong ka jingpeit jong ka Khasi Hills Autonomous District kila ia poi lang na kylleng ha ka dorbar bah kaba la long mynta ka sngi ha Madan Student’s ban jied ia ki nongkitkam kane ka kynhun katkum ka lynti jong ka ain.
Ha kane ka jingia jied nongkit kam, u Pa’im Naindro Syiemiong Syiem jong ka Hima Maharam u la shah jied kum u Chairman kane ka kynhun, u Bha Boldness L Nongum bade y rangbah shnong ka shnong Mawlai Iewrynhep kila shah jied kum ki Vice Chairman, u Secretary pat la jied ia u Pa,im Ainam Manik Syiem bad Joint Secretary la jied ia u Lyngdoh ka hima Lyniong.
U Pa,im jong ka Hima Khyriem u Pa,in Balajied Syiem u la shah jied kum u nongbat ia ka pla tyngka jong ka KCTCH. Ha kane ka sngi la jied ruh ia ki nongkit kam ba long ha ka executive committee phra ngut ki sirdar, ki myntri bad san ngut ki rangbah shnong bad ar ngut kiwei pat ka KHADC kan sa thung ha kane ka kynhun.
Ha ka jingkren jong u CEM jong ka KHADC u Bah HS Shylla halor ka jingtrei kam kane ka KCTCH, ka long ba ia kane ka kynhun la ithuh da ka ain bad kane, kane ka lah ban thoh sha ka sorkar, pdeng ka sorkar jylla bad kum juh sha ka KHADC ha kaba ia dei bad ki kam hima sima.
U CEM ka KHADC, u la ong ba kane ka khynhun ka lah ban ia kren ha ki shnong ki thaw bad ban pynshai paidbah ruh ha kaba ia dei bad kam elekshon, ban kyntu ia ki paidbah ba kim dei ban die taddor ia ka vote jong ki ha ka por elekshon. Kum ka jingsdang ia kane ka seng ban trei kam na ka liang jong ka KHADC ka la ai shilak tyngka. Ia ka ophis trei kam ka KCTCH yn buh ha Pariew shipor ha jan Madan Iewrynhep.
