Shillong, Jymmang 31: U Bah Himalaya Shangpliang MLA jong ka Mawsynram Konstitwensi mynta ka sngi u la ai ka jingiaroh ia ka sorkar jong u Conrad K Sangma bad kum juh ia u Bah Banteidor Lyngdoh myntri ba dei peit ia ka tnad rep,kaba la ai ia ka jingithuh ia u sla tyrpad bad ia u Sohmarit ba kin long noh ki marrep.
Haba kren ha ki lad pathai khubor mynta ka sngi u la iathuh ba ka sorkar jong u Conrad mynta ka sngi kala pynmih ia ka jingpynbna sorkar ba ia u sla Tyrpad bad ia u Sohmarit la iathuh kum ki marrep naduh mynta ka sngi.
La ong ba kane ka jingjop ka dei jong ki nongrep ha ka jylla baroh kawei, da ka jingpynkylla marrep ia kitei ki ar tylli ki jingthung kaba ki sorkar kiba la leit noh kila niew ba ki dei ki markhlaw kala buh ia ki jingeh ia ki nongrep ha kaba ki hap ban siew shibun ka khajna.
Mynta da kane ka jingpynkylla marrep kila lait na ka jingshah shim khajana ha ki khyrdop jong ka sorkar jylla bad kum juh ha ki khyrdop jong ki District Council. Da kane ka jingleh jong ka sorkar ka jingmyntoi ia ki nongrep ka long ba kin ioh ia ki jingmyntoi kumba long lem kiwei ki marrep.
Ka burom ka leit sha u MLA jong ka Mawsynram, u ba la wanrah ia ka jingiakren hapoh ka iing dorbar ban dawa na ka sorkar ba ka dei ban ithuh noh ia kine ki mar khlaw kum ki marrep ha ka dorbar mang tyngka mynta u snem ha kaba u myntri ka kam rep u bah Banteidor Lyngdoh u al ai ka jingkular ba ka sorkar kan sa leh ia kaba don kam.
