Shillong, Nailar 15: Ka KSU Education Cell lyngba kane ka kyrwoh ka pynpaw ïa ka jingsngew bynniaw halor ka jingleh jubor jong U Vice-Chancellor ka NEHU, u Prof. S.K. Srivastava da kaba pyrshang ban pynthohbria ïa ka jongshakri jong ka Prof. S.M. Sungoh kum ka Professor jong ka Education Department ha skulbah NEHU.
Kane ka professor ka la ai ka jingshakari ha ka skulbah NEHU la kumba 25 snem tam bad ka la noh synñiang ha kiba bun ki liang khamtam ha kaba ïadei bad ki samla pule jong ka jylla bad na kiwei ruh ki jylla jong ka thaiñ shatei lam mihngi. Ha kine ki 25 snem jong ka jingshakri jong ka, kane ka professor ka la trei shitom bad ka la noh synñiang shibun ha kaba iadei kaba kyntiew ïa ka rukom hikai ha ka ka pule puthi, ka wadbniah bad kumjuh ha kaba pynthymmai ïa ki course.
Namar kane ka jingtrei shitom jong ka ha kaba ïadei bad ka pule puthi, ka la noh u synñiang uba khraw sha ka skulbah NEHU bad ka jylla Meghalaya ruh kumjuh. Kane ka professor ka la long ruh ka dkhot jong ka National Assessment and Accreditation Council (NAAC), Ka Dean jong ka School of Education bad ruh ka dkhot jong ka Executive Council jong ka NEHU.
Ka KSU ka sngewkhia shi katdei eh haba ka ïohi ha ki kotkhubor ba kane ka professor ka la shah kynnoh khlem nongrim ha u Prof. S. K. Srivastava da kaba ong ba kam shym la kohnguh ïa ka jingbthah jong u Visitor ka NEHU uba dei u President ka ri India. Ha ka jingshisha katkum ka jingtip ba la ïoh, u Visitor jong ka NEHU um shym la ai kano kano ka jingbthah sha ka Prof. S.M. Sungoh kumba la kynnoh da u VC.
Ha ka jngshisha kam don satia kaba kum kata ka jingbthah sha ka Prof. S.M. Sungoh bad wat lada ka don kaba kum kata, kata ka jingbthah ka dei na ka bynta ka Executive Council jong ka NEHU hynrei ym ïa ka Prof . Sungoh shimet kum ka dkhot jong ka EC. Kaei kaba jia ia ka Prof. Sungoh pat ka long ba u Prof. S. K. Srivastava u la phah da ka shithi sha ka da kaba kynnoh ba kam shym la kohnguh ïa ka jingbthah jong ki bor ba halor bad ïa kane ka shithi la buh ruh ha ka personal file jong ka.
Kaba kham lyngngoh shuh shuh ka long ba une u VC u dang khyllie ïa kane ka mat hadien lai snem. Ka jingthmu jong une u Prof. S. K. Srvastava ka long ban pyntieng ïa kane ka professor bad kumjuh ban khanglad ba kan ym lah ban thep ïa ka post Vice-Chancellor kaba la lait mynta ha NEHU.
Ka KSU ka pynrem jur ïa kane ka jingleh buit tuh buit poh jong une u VC khamtam eh haduh ba un khanglad lane ban pyrshah ïa ka na ka ban apply ïa ki post ba kham halor na bynta ban shakri kham bha. Ka KSU ka pynrem jur shuh shuh ïa ka jingpyndonkam bakla jong une u VC ïa ka bor ba la pynkup ha u ha kaba u la leh bad shim rai shimet ha man la ki mat bad ka rukom treikam jong ka sklubah NEHU.
Ka KSU ka sngew ban pynpaw ruh ba ka jingleh jong une u VC ka long shibynta ban ñiewbein ïa ki trai ri kiba trei bad don ha skulbah NEHU. Ka KSU ka pynshai ba ka pynrem bad kan ym map ïa kum kine ki jingleh. Na ka liang jong ka seng, ka pynrem jur ia kane ka jingleh jong une u VC Prof SK Srivastava bad ka dawa ruh ba dei ban pynshitom ïa u.
Ka KSU ka pynpaw ruh ba ka long pat kaba ai mynsiem pat ban tip ba na ka liang ka National Women’s Commission bad kumjuh ruh ka National Scheduled Tribes Commission ki la phah da ka jingtohkit halor kine ki jingleh bym suitñiew bad leh donbor jong une u VC Prof S. K . Srivastava khamtam ha ka ban pynthohbria da kiba bun ki rukom. Na ka liang ka KSU ka ai mynsiem bad pynpaw ruh ia ka jingkyrshan ïa ka Prof. Sungoh, Kane ka long katkum ka kyrwoh bala phah da u Samla Shining Star Kharbihkhiew Vice Chairman Education Cell KSU.
