Shillong, Iaiong 17: U bah M Rapsang u trai jong ka ka Rap’s Departmental Store MG Road Keating Road, Shillong ba sah ha Jaiaw Langsning Shillong mynta ka sngi u la ujor da ka FIR pyrshah ia ki briew bym tip kiba la pynsaphriang ha ki social media ba ka jingkhang ia ka dukan ka dei ba ki trai kane ka dukan la antad ba ki leit sha Bethany Hospital.
Ha kane ka FIR kaba la ai mynta ka sngi sha ka Superintendent ki pulit jong ka East Khasi Hills District u bah M Rapsang u la thoh shai ba katkum ka jingtip jong u ba baroh kiba ha iing ha sem jong u kim shym leit sha Bethany Hospital ha kine ki bnai kiba la dep.
Ha kane ka FIR kaba la ai mynta ka sngi sha ki pulit na ka liang jong u bah M Rapsang u la shuh lang ruh ia ka message kaba la saphriang ha Shillong ha kine ki ar lai sngi, ha ka FIR la ong ba kane ka jingleh ka dei tang ban pynbud nam da ki katto katne ki riew shimet ia ka nam ka burom jong ka Rap’s Departmental Store bad ia ka ing ka sem jong u.
Ha ka FIR, u Bah M Rapsang u la kyrpad ia ki bor pulit ban tohkit bad ban kem ia kito ki briew kiba kiba la leh ia kane kam ban kem mardor. Ia kane ka FIR la ioh pdiang da ka ophis jong ka Superintendent ki pulit ka East Khasi Hills District ia kaba la soi hi da u trai dukan u Bah M Rapsang.
