Shillong, Naitung 06: Ka Executive Committee jong u Bah HS Shylla hapoh jong ka KHADC mynta ka sngi kala phah da ka jingthoh sha u Myntri rangbah ka jylla ban ujor pyrshah ia ka Chairperson jong ka Meghalaya State Women Commission halor ka jingujor jong ka ia ka Bill bala pass da ka KHADC sha u Lat jong ka jylla.
Haba kren ha ki nongthoh khubor mynta ka sngi u Chief Executive Member jong ka KHADC u Bah HS Shylla la ong ba ka EC mynta ka sngi kala phah ia ka jingujor sha u myntri rangbah jong ka jylla bad dawa ba dei ban phah tohkit ia ka Chairperson jong ka MSWC halor ka jingujor jong ka ia Bill jong ka KHADC sha u Lat jong ka jylla.
U Bah Shylla u la ong ba ka MSWC ka don ia ka bor ban bishar, hynrei kumno ka Chairperson jong ka commission ka leit ban ujor sha u Lat ka jylla khlem da shim ia ka jingbishar na baroh ar liang manla, ka jingleit ujor jong ka Chairperson ka long tang halor ka jingujor na kawei ka liang, kata ka liang ba pyrshah.
Ha ka jingshisha kum ka Comission kala dei ban sngap shuwa ruh ia ka liang kiba kyrshan bad ha dien ba la ioh ia ka jingthoh na baroh ar liang kan sa shong bishar bad sa leh ia kaba don kam hynrei ha kane ka jingleit ujor ka Chairperson jong ka MSWC kala pynlong ia ka Commission kum ka kynhun seng bhalang.
Haba ia dei ba ka jingkren jong u CEM jong ka JHADC, u Bah Shylla u la ong ba u pdiang sngewbha ia ka jingpynsngew jong u bad na ka liang jong ka KHADC kan sa thoh ban ia kynduh la ka long ha Shillong ne ha Jowai. Halor ka jingai jingmut kiba bun ba lang ba ia ha kane ka bill dei ban khanglang ruh ia ki shynrang na ka liang jong u CEM u la ong ba na ka liang jong ka EC ruh ka sngew ia hap ia kane ka jingai jingmut.
Halor ka jingphah biang jong u Lat ia ka Bill sha ka sorkar jylla u Bah Shylla u la ong ba u Lat u la leh katkum ka lynti, hynrei lada phah sha ka Ministry Home Affair jong ka sorkar pdeng kan nym don lynti, lada u leh kumta ka long beit ban pyniap ia kane ka Bills la pynsngew u CEM ka KHADC.
Ka KHADC kala pass ia kane ka Bill hapoh ka kyndon jong ka Riti Synshar jong ka Ri India katkum ka article 29 hapoh ka klos (I) kaba kren shai ban ai ka jingiada ia ki briew kiba rit paid bad ka KHADC ka laleh katkum ki kyndon jong ka ain. Ia kane ka ka Khasi Hills Autonomous District (Khasi Social Custom of Lineage) Second Amendment Bill, 2018 ka long ban wanrah ia ka jingpynrung thymmai ia ka jingkhang syndon ia ki Khasi ban ia shong kha bad ki bymdei khasi.
ka Khasi Hills Autonomous District (Khasi Social Custom of Lineage) Act 2005, kala dep ban batai shai kiei ki khasi. Hapoh kane ka ain kala kren shai ruh ba ki kynthei khasi kiba ioh lok da u bym dei khasi kim dei shuh ki khasi la pynshai u Bah Shylla CEM jong ka KHADC.
