Shillong, Nailar 29: Ki artylli ki Sengbhalang ba pawnam ka Jylla , ka KSU Laskein Circle bad ka JSU Laskeiñ Circle mynta ka sngi kila leit ban ai daka jingthoh ujor sha ophis jong u Secretary jong ka PWD (R&B) Shillong naka bynta ban ujor pyrshah halor ka jingpynslem ban shna ia u surok Pasyih Garampani.
Ki nongialam jong kitei ki ar tylli ki Seng haka jingthoh ba ki la phah sha u Secretary ka PWD ( Roads & Building) u bah PR Marweiñ iakaba lasoi da u samla Dapmaiñ Suchiang President ka JSU Laskein Circle bad u Samla Balawan Suchiang President Laskeiñ Circle.
Kine ki nongialam ki la pynpaw ba ki dap daka jingsngewkhia halor ka jingeh kaba la mad daki nongleit nongwan hapoh ka thaiñ Laskeiñ Block naka daw ka jingsniew palat u surok Pasyih Garampani ( PG Road). Ka jingsniew jong utei u surok ka buh iaka jingeh kaba khraw iaki paidbah khamtam haba pang ba shitom ne don kino kino ki kam ba kyrkieh.
Haka jingthoh ki Ar Sengbhalang kila pynpaw ruh ba ki la ioh jingtip kaba tikna ba ka sorkar lyngba ka tnad PWD (Roads) ka la dep khot iaka E-Tender naka bynta utei u surok Pasyih-Garampani haka 20 tarik, July 2020, bad ka la iaid mynta la palat shibnai eiei hynrei haduh mynta ympat Allot naka bynta ban sdang iakatei ka jingshna ia utei u surok uba don haka jingjngai kumba 26.982 KM haka dor 66,70,33,300.00 iakaba la bei tyngka hapoh ka skim Meghalaya Integrated Transport Project.
” Ngi ioh jingtip ba ka sorkar lyngba ka tnad jngoh kai pyrthei ka la thmu ban wanrah iaki skim pynroi iaki kam jngohkai pyrthei daki phew klur sha katei ka thaiñ, hynrei ka jingkylli ka long ba hato haduh katno kan kiew ka kam jngohkai pyrthei lada ngim ioh ia u surok uba bha bad paka uba long u budlum ka roi ka par” la pynpaw ki nongialam kitei ki ar Sengbhalang.
Kitei ki artylli ki Seng ki la dawa jur na ka sorkar ba kadei ban pynkloi sted ban shna ia utei u surok namar kumba la iohi jingtip iakatei ka skim ban shna ia utei u surok la bei tyngka daka World Bank kumta lada ka jingpyntrei ia utei u surok ka shimpor slem ne don kynrum kynram katei ka skim ka lah ban duh noh ne shah pynkynriah shawei pat kumta lada kan jia kumta kan sa long ka jingduh nong kaba khraw iaki paidbah nongshong shnong ka thaiñ Laskein Block.
“Ngin iai buddien iakane ka kam khlem shongthait khnang ba ki paidbah ka thain kin ioh ia u surok uba bha bad paka bad ngi dawa jur ruh naka sorkar ba kam dei ban ai kulmar sha ki Contractor kiba shna tangdep rukom namar hynrei ngi kwah ban ioh da ki contractor kiba treihok ” la pynpaw ki nongialam ka KSU bad JSU.
