Shillong, Iaiong 19: Mynta ka sngi ka “Synjuk Waheh Shnong ka Ri Jaintia” kila phah da ka jingthoh sha u symbut myntri rangbah ka jylla u bah Prestone Tynsong ba dei peit ia ka tnad bording ba pynpaw ia ka jingpyrshah ha kaba ia dei bad ka jingpyndait ia ki Smart Meters ha Jaintia Hills.
Ha ka jingthoh kaba la phah sha u bah Prestone kila kdew ba ki pyrshah ia ka rai ban pyndait ia ka Smart Meters, ia kane ka rai ban pyrshah ia kane ka jingthmu kila shim ha ka jingialang kaba la dep long ha ka 11 Lber 2022 bad ia kane ka rai la phah mynta ka sngi sha ka sorkar.
Kane ka synjuk ki Waheh Shnong ka Ri Jaintia kila kdew ba ka daw jong ka jingpyrshah ia ki ia ka jingthmu ban pynaid ia ki Smart Meters namar ba kine ki metter ki don ki jingthut la kynnoh ka synjuk bad kim lah ban trei kam bha.
Kine ki meter kim iarap ba kumno ki nongpyndon kam light kin tip katno ka jingpyndon kam light kila pyndon kam. Kine ki meters kim ai kata ka jingpynshai la ki pyndon kam duna ne bun ia ka light. Kane ka jingthmu kan ktah ia ki paidbah kiba duk ba rangli ha Jaintia Hills.
Ha kane ka jingthoh kaba la phah sha u symbut myntri rangbah ka jylla kila ong ba ki don bun ki shnong kiba khlem don transformer palat bnai hynrei ka bill light pat ka poi thik thik kane ka wanrah ka jingduh kaba khraw ia ki paidbah. Ia kane ka jingthoh la soi da u President Synjuk Waheh Shnong Ri Jaintia, President Synjuk Waheh Shnong East Jaintia Hills District, General secretary Synjuk Waheh Shnong Ri Jaintia Jowai.
