Shillong, Jylliew 30: U Managing Director jong ka, Meghalaya Industrial Development Corporation (MIDC) Ltd., Shillong u la ai da ka jingujor sha ki pulit ba u Bah Denis Siangshai na ka shnong Mookhep ha u snem 2009-2010 u la shim ram na ka corporation T. 1,50,00,000/- hynrei haduh mynta u khlem leit ban siew.
Ha kane ka jingujor sha ki pulit na ka liang jong u MD jong ka MIDC u la ong ba u Bah Denis um shym la burom ia ki kyndon kiba la buh ha ka shithi kaba la ai sha u ha ka por ba pynlait ia katei ka pisa, kaba la kham ktah eh ka long ba katkum ka shithi kaba la ai da ka Meghalaya Rural Bank kala paw shai ba u tei u rangbah u la pynjot ia ki kotto katne ki jingthoh.
Ha kane ka jingujor sha ki pulit na ka liang jong ka MDIC kala kynnoh ba la shna ia ki kot ki sla kiba thok, khamtam eh ha kaba ia dei bad ka shithi kaba la soi da u Assistant General Manager ba mynshuwa jong ka Corporation bad kane ka long kam shukor ia ka ophis.
