Shillong, Nailar 2
1: Ka Shillong Lajong Academy ,India kala wan ba hynriew ha ka jingialehkai kynjat boll jong ka kynhun ki ri kiba don hapoh jong ka BRICS kaba la long ha Ri China. Kane ka dei ka BRICS U-12 International Youth Football Tournament. Ia kane ka jingialehkai la pynlong ha Putian, China. Baroh ki don 16 tylli ki kynhun kiba la wan ia shim bynta na ki san tylli ki ri jong ka pyrthei, ka Brazil, Russia, India, China bad ka South Africa.
Ka Shillong Lajong ka hap hapoh jong ka group B, ha ka jingialehkai hapoh ka kynhun ka Shillong Lajong kala jop pyrshah ia ka Luoyang Xiang,China by 3-1, kala ia ryngkat bad ka Dongguan Machong FC da kaba ia thep mar shikol bad pyrshah ia ka Fujian Outshion FC kala jop da shikol ha ka jingialehkai kynhun bad poi sha ka quarterfinals.
Hynrei ka Lajong Junior Reds, kala shah rem noh ha ka Green Town Yuhua Taohuayuan, China ha ka quarterfinals ha ka jingiakynjat penalty da 5-4. Kine ki kynhun kila ia thep mar shikol ha ka jingialehkai.
Ha dien kane ka jingshah rem ka Shillong Lajong kala hap ban shuialehkai tang ia knieh ia ka jingwan sha khmat na pdeng ki team kiba la wan ia shim bynta. Ha kane ka jingialehkai ka Shillong Lajong kala ia kynduh bad ka Luch-Energia Vladivostok FC jong ka Ri Russia bad kala jop ha ka jingiakynjat penalty da 4-3 ha dien ba kine ki team kila ia thep mar lai kol ha ka jingialehkai. Ka Shillong Lajong kala ia lehkai khatduh bad ka Qingdao Kunpeng FC, China ha kaba la jop da shikol.
Na ka liang jong ka Club ka sngewsarong ia ka jinglehbha jong ki khynnah ha kane ka jingialehkai kaba long sha bar jong ka Ri bad kane ka kynhun ialehkai mynta ka wan phai noh da ka ioh ia ka kyrdan kaba hynriew na ki 16 tylli ki kynhin ia lehkai na ki san tylli ki ri jong ka pyrthei.
