Guwahahti, Risaw 08: Ka myntri ia da Ri ka Nirmala Sitharaman, ha ka sien kaba nyngkong kala wan jngoh ia ki len shipai kiba don ha North East, kane ka dei ka jingwan kaba nyngkong ka jong ka ha dien ba kala shimti ia kane ka kam kum ka myntri iada Ri, kane ka myntri kala poi ha Tezpur mynta ka sngi.
Kane ka jingwan jngoh jong ka ia kine ki len shipai ha kane ka dang shatei lam mih ngi jong ka Ri India ka long ba kan sngewthuh ia ka jingdon jong ki shipai ha kane ka thain bad ka kad shipai suin kaba don ha Tezpur ka long kaba don kam eh na ka bynta ka Ri ha kane ka thain bad ban tip haduh katno ki shipai ryngkew bad ki shipai suin ki long kiba la khreh.
Ka myntri iada Ri kala leit ruh ban jngoh ia kiwei kiwei ki len shipai kiba don ha Assam khamtam ia ka Gajraj Corps headquarter ia kaba la batai ia ka jinglong jingman da u GOC Gajraj Corps Lt Gen AS Bedi ha kaba ia dei bad ka jinglong jingman jong ka shong suk shong sian ha Assam bad ka jylla ba ia khap ka Arunachal Pradesh bad ka District jong ka Kameng na ka liang jong ka myntri kala ong ba ka sorkar kan sa dang pynkhlain shuh shuh ia ki bor shipai ha ki khappud.
Ka Myntri iada Ri kala leit ban jngoh ruh ia ka Solmara Military Station,ha Tezpur ha kaba kala ia kren bad ki heh shipai ha kane ka jaka bad kala ai mynsiem ia ki wat la ki don ha ka jaka kaba eh ba shitom. Kala ai ka jingiaroh ia ki shipai ba wat hapeng ki jingeh kiba bun kila bat ia la burom jogn ka Ri bad kala pynpaw ia ka jingsngew kmen ban iohi ba ki long kiba la kreh na ka bynta ka Ri.
Ia kane myntri ida Ri la synrang lang da u Vice Chief jong ki shipai Staff Lt Gen Sarath Chand bad u GOC-in-C Eastern Command Lt Gen Abhay Krishna.La pdiang burom ia ka myntri hapoh jong ka kad lieng suin jong ki shipai ha Tezpur Airforce Station da u GOC Gajraj Corps Lt Gen AS Bedi bad kiwei kiwei ki heh shipai jong ka tnad shipai suin.
