Shillong, Risaw 03: Mynta ka sngi u wei na ki dkhot jong ka seng HNLC u Edwin Shillangam u ba dang 17 snem ka rta u la wan ban pyndem ia lade ha khmat jong ki pulit jong ka East Khasi Hills District Shillong da ka jingkwah ban im noh ka jingim kumba long len kiwei.
Katkum ka jingphla ha khmat jong ki pulit la ong ba u la leit ban pyniasoh bad ka seng lehnoh HNLC ha u snem 2016 ha kaba u dang dap tang 16 snem bad mynta u la kot sha ka 17 snem. Une u khynnah u dei na ka shnong Lakadong kaba hap hapoh jong ka East Jiantia Hills District.
Une u khynnah u ba la wan pyndem mynta ka sngi u la wan pyndem tang ia lade shimet ha kaba ym shym la wanrah kano kano ka tiar ia leh. Na ka liang jong ki pulit kila pdiang ia u bad ka jingtohkit kan dang iaid. Ka daw jong ka jingwan pyndem noh ka jong u ka long ba baroh ki dkhot jong ka seng HNLC kiba don ha Bangladesh la pyntrei bylla ia ki ha ki jaka rep tympew.
