Shillong, Jylliew 24: U Deputy Chief Executive Member jong ka Khasi Hills Autonomous District Council u Bah Gigur Myrthong ba dei peit ia ka pla pisa mynta ka sngi u la wan rah ia ka mang tyngka hapoh ka iing dorbar na ka bynta u snem 2020-2021 kaba duna T.50,910/- tyngka ha ka sngi sdang jong ka dorbar mang tyngka kaba lai sngi.
Haba kren hapoh ka iing dorbar ba wan rah ia kane ka mang tyngka jong mynta u snem 2020-2021 u la ong ba ka jingkhein antad ba ka jingpynlut kan long haduh T.243,72,89,930/- klur tyngka katba ka jingmih kan long T.243,72,39,020/- klur tyngka, kane ka mang tyngka ka long kaba duna haduh T.50,910/- tyngka.
U Deputy CEM jong ka KHADC haba wan rah ia kane ka mang tyngka u la ong ba ka KHADC kala ioh T.27,60,39,00/- klur tyngka bad kyrmen ia kaba dang sah ruh ka sorkar pdeng kan sa pynlai tnoh shen ia kaba dang sah.
Ki jingmih kaba ka KHADC ka khmih lynti ban ioh ka long na ka khajna khyndew, ka khajna na ki markhlaw, da kaba die ia ki stamp kiba dei bad ka kashari, ka musur na ki iew, kaba ai laisen khaii, ka jingdie ia ki kot kiba ka KHADC ka pynmih, ka bhah na ka khajna jong ki marpoh khyndew, ki khajna na ki kali, khana na ki kam ba ki briew ki trei. Ki jingiarap na ka sorkar pdeng, ka jingiarap na kaba iada ia ki khyndew jong ki riew lum bad na ki khyrdop.
Ki jinglut kiba ka KHADC kan pynlut ka long ha ka tnad GAD, kaba dei ban siew ia ka tulop jong ki nongtrei bad ki dkhot ka iing dorbar kyntup ia u CEM bad ki EM bad kiwei ki jingsiew, ka jingsiew ia ki nongtrei ka tnad ain, ka jingsiew ia ka tnad pla pisa, ka jingsiew ia ka tnad Kashari, jinglut na ka bynta ka Legislative, ki kam kiba ka KHADC kan pyntrei bad ia ka tnad enforcement ban iada ia khyndew jong ki riewlum.
Ha kane ka mang tyngka kaba mynta na ka liang jong ka KHADC kam shym la don ka jingmang tyngka ia ka tnad pule puthi. Ha ka jingkren jong u Bah Gigur u la ong ba na ka liang jong ka Council kan ia leh ban adkar ha kaba ia dei bad ki jingpynlut bad ha ka juh ka por Council kan ia leh ban dang wat ki lat ki lynti ban pynioh pisa ia ka Council.
