Shillong, Lber 12: U myntri rangbah ka jong ka sorkar Meghalaya u Coanrd K Sangma u ba bat ruh ia ka pla pisa mynta ka sngi u la wan rah ia ka mang tyngka na ka bynta u snem 2019-2020 ha ka jingduna
kaba T. 1323 klur tyngka.
Katkum ka jingmang antad baroh ka jingioh khein lang ia ka ram kaba ka sorkar kan shim kan poi T.14463 klur bad ka jingpynlut kan kot sha ka T.15786 klur, bad kane ka pyni ba ka don ka jingduna pisa da T.1323 klur.
U myntri rangbah u la ong ba la khien antad ba ka jingmih na ki khajna bad ki byndei khajana ha kane ka snem mang tyngka 2019-20 kan long T.2090 klur bad T.601 klur. U myntri rangbah u la ong ba ka sorkar kan wanrah ia ki lad ki lynti kumno ban pynbha shuh shuh ia ka jinglum khajna.
La ong ba tang ka jinglum khajna na ka tnad lum khajna jong ka sorkar kan kot sha ka T.1478 klur. Ka jinglum khajna na ka kyiad bad ki kali kan kot sha ka T.1716 klur. La ong ruh ba la shim bun ki lad ki lynti kumno ban pynbha ia ka jinglum khajna na ki kali.
Haka juh ka por la iathuh ruh ba na ka liang jong ka sorkar jylla kan ialeh katba lah ban pynioh ia ki skhim bapher bapher na ka sorkar pdeng lyngba ki skhim bapher bapher. U myntri rangbah u la ong ba ka jingiakren bad ka jylla Assam ban ia pynbeit ia u pud u sam ka dang ia beteng bad ka jingiakren kan long ha dien ka Lok Sabha ilekshon.
