New Delhi, Sept 23: U Myntri Sorkar Pdeng ba dei khmih ia ka tnat Communications, u Ashwini Vaishnaw u la ong dang shen, “Ki jingpynkylla ha ki kam telecom ki dei ha ka jingthmu ban pynthikna ba baroh ki briew ki ioh ia ka internet bad ka tele-connectivity katkum ka juk mynta.”
Ha ka sienjam kaba khraw na ka bynta ka jingkot sha kane ka thong, ka tnat Telecommunications, jong ka Sorkar India ka la ai katto katne ki hukum ban pynsuk ia ki kam KYC bad kine kin plié lad ia ki jingpynkylla ha ki kam telecom kumba la pynbna da ka Kynhun Myntri Sorkar Pdeng ha ka 15.09.2021.
Kumba long mynta, ki briew ki donkam ban pyndep ia ka kam KYC kaba mut ba ki hap ban leit sha ki jaka kiba tip kum ki Point of Sale bad ki hap ban rah ia ki kot ki sla ai jingpynshisha jong ki ban ioh ia ki number mobile ba thymmai lane ban pynkylla na ka Prepaid sha ka Postpaid lane na ka Postpaid sha ka Prepaid.
Ki kam online delivery ki la iaid kam bha ha kine ki por mynta bad bun ia ki jingshakri sha ki briew ki wan lyngba ki rynsan internet ha kaba ki hap ban ioh ia u OTP. Dei ban kyntiew ia ki jingshakri kiba lait na ka jinghapiakynduh briew ha kane ka por jong ka khlam COVID khnang ban pynsuk ia ki briew bad ruh ban suk ha ki kam khaii.
Haba pyndonkam ia u Aadhaar bad haba dang shim ia ki jingtip na ka UIDAI dei ban ioh shuwa ia ka jingbit na ki briew. Namar kane, ka DoT ka la ai ia kine ki hukum harumhaba pyndep ia ki kam KYC khlem da hap ban iakynduh ia ki briew.
Ka e-KYC ba buh nongrim ha ka Aadhaar, La wanrah biang ia ka kam e-KYC ba buh nongrim ha ka Aadhaar khnang ban ioh ia ki connection mobile ba thymmai. Yn shim T. 1 na ki Telecom Service Provider ia man u briew ba hap ban pynshisha da ka UIDAI.
Kane ka dei ka kam ka bym donkam ia ki kot ki sla bad kaba iaid lyngba ki rynsan digital ha kaba ki jingtip bad ka dur jong u briew ka wan lyngba ki lad online sha ki Telecom Service Provider (TSP) na ka UIDAI.
Ka KYC ba ai hi, Ha kane ka kam, ia ka jingai ia ki connection mobile sha ki briew la leh lyngba ki App bad ki rynsan online ha kaba ki briew ki aplai na ki mobile jong ki na la iing bad ia ki SIM yn pynpoi sha ki iing jong ki hadien ba la pyndonkam ia ki jingtip ba la pynshisha da ka UIDAI ne ka DigiLocker.
Ka jingpynkylla na ka Prepaid sha ka Postpaid ne na ka Postpaid sha ka Prepaid da kaba pyndonkam ia u OTP, Ka jingpyntreikam iajingpynkylla kaba buh nongrim ha u OTP ka plié lad ia ki briew ba kin pynkylla na ka Prepaid sha ka Postpaid ne na ka Postpaid sha ka Prepaid na la iing da kaba ai ia u OTP.
