Shillong, K’lyngkot, 02: Ki rang bad ki thei ïalehkai Taekondo na ka Jylla Meghalaya ki la wanrah nam wanrah burom ïa ka Jylla Meghalaya da ki taksa ksiar, takma rupa bad takma rnong ha ka Taekofest-2017 kaba la long ha sorbah Kolkata.
Ha kane ka lympung ïalehkai kaba la sdang naduh ka 17 tarik, Nohprah, 2017 haduh 20 tarik, Nohprah, 2017 ha Girish Park, Kolkata ba la pynlong da ka Taekondo Academy of Exellence, ki don 22 ngut ki nongïashim bynta ba kynthup ïa 16 ngut ki shynrang bad 6 ngut ki kynthei.
Ki nongïashim bynta ki kynthup ha ka kyrdan Sub Junior, Junior, Cadet bad Senior.
Ha ka kyrdan Senior kiba la ïohrah ïa ka namjop ki kynthup ïa u Aiborlang Syngkli, u Sunny Kumar Shah bad u Imran Khan. Kine ki lai ngut ki la ïoh rah ïa ka namjop da kaba ïoh khur ïa ka takma Rnong.
Ha ka kyrdan Sub Junior, kiba la ïohrah ïa ka namjop ki kynthup ïa u Rohit Rawani Singh uba la ïoh khur ïa ka takma Ksiar bad ka Mercyfull Shadap kaba la ïohrah ïa ka takma Rnong.
Ha ka kyrdan Junior, ki nongjop kiba la ïoh khur ïa ka takma Ksiar ki kynthup ïa u Gobin Kumar Ray, u Rudhra Bdr Chettri, bad u Wansalan Dkhar.
Katba u Francis Hek u la ïohrah ïa ka takma Rupa bad ka Damerica Lyngdoh Thabah.
Ha kane kajuh ka kyrdan kiba la ïohrah ïa ka takma Rnong ki kynthup ïa ka Pinky Kumari, ka Rukhsana Begum, u Chandra B Tiwari bad u Vikash Tiwari.
