Shillong, Naiwieng 08: U Chief Executive member ka KHADC u bah Titosstarwell Chyne mynta ka sngi u la wan rah ia ka “The Khasi Hills Autonomous District (Khasi Inheritance of Property) Bill, 2021 bad kane ka bill ynda kala kylla ain kan trei kam habroh ki bynta jong ka KHADC.
Haba kren hapoh ka iing dorbar haba wan rah ia kane ka Bill ban ai bynta lang ia ki jaka puta sha ki shynrang u CEM jong ka KHADC ka long ba da kane ka Bill ynda ka long ain kan ai bor ia ki kmie ki kpa ban bate kam ia ki khun jong ki kynthei bad shynrang katkum ka jingsngewbit ka jong ki.
Kane ka bill kan iada ruh ia kito kiba don lok pat ia kawei namar ki don bun ki mukotduma kaba don ka jingiaknieh ia ka jingdon jignem u kpa ka kmie ynda kila khlad mih bun ki jingeh da kane ka ain kan iarap ban pynlait na ka jingiaknieh.
U CEM u la ong ba kane ka bill kan iada na ka jingshah knieh na kiba ha iing ha sem lada dei ka iing iap duh, bun sien haba khlad noh ki kmie ki kpa ki kur ki juh knieh ia ka jingdon jingem ki khun namar kam don ka ain kane kan iada ia ki ruh.
Kane ka ain kan ai bor ruh ia ki dorbar shnong ba kin long ki nongsakhi ha kaba ia dei bad ka jingsam ia ki jaka puta bad kane kan iada na ka jingshah kniot beain, kaba kongsan baroh ka dei ka shong ha ka mon jong ki kmie ki kpa ban ai jaka.
Na ka liang jong u CEM u la kyntu ia ki dkhot ka iing dorbar ba kin wanrah ia kano kano ka jingai jingmut ne ban pynkylla lada ki don namar ban ia kren bha halor kane ka bill ban ia kren na ka bynta ka jingmyntoi jong ki shynrang bad kynthei ban ia ioh bynta lang ha ka jingdon jingem.
