Shillong, Jymmang 04: U Chief secretary jong ka jylla u la ong ba la iohi ba ha ka sngi ba pynlait nyngkong ia ka jingpakhang, kiba bun kila pynkhein ia ki kyndon jong ka jingpynia jngai kaba la tip kum ka “Social Distancing”.
Ia kane la iohi bha ha ki dukan die kyiad, ia kane ka jingpynkhein ia kane ka jingpyniajngai la iohi ruh ha ki ophis sorkar, Kane ka jingleh ka lah ban pynsepei ia ka jingpyrshang jong ka sorkar ban khanglad ia ka jingsphriang jong u khniang jingpang ka khlam COVID-19.
U Chief Secretary u la pynmih ia ka hukum ba lada dang don kino kino kiba pynkhein ia ka hukum jingpyniajngai bad ba khlem dang mask ha ki jaka paidbah yn pynshitom ia ki hapoh ka kyndon 269 jong ka Indian Penal Code bad kiwei kiwei ki kyndon.
Kumta ki trai dukan kihap ban shim ia ki lat ki lynti ban pynbeit ia kane ba kan nym don ka jingpynkhein ia ki kyndon jong ka jingpynia jngai ha khmat ka dukan jong ki. Lada pynkhein ia kitei ki kyndon hap ban khang ia ki dukan jong ki.
Kane ka jinghamam kan long ruh ia ki khlieh jong ki tnad sorkar bapher bapher ba kin pyntrei kam ia kitei ki kyndon baroh ban pynthikna ba kan nym don ka jingpynkhien ia ka hukum jingpynia jngai ha ki jaka trei.
