Shillong, Naiwieng 25: Ka jingle niam leh rukom ka Hima Khyriem la pyndep mynta ka sngi da ka shad ka kmen ia kaba la tip kum ka shad niam Nongkrem. Katkum ka jingbor jong ka District Administration la shah ban shad tang 40 ngut kynthei bad shynrang ban pyndep ia ka jingle niam.
Ha kane ka sngi u nongbishar rangbah jong ka High Court jong ka jylla Meghalaya u Mr Justice Biswanath Somadder ryngkat ka kurim jong u kila wan lang ban sakhi ia kane ka shad nongkrem ha ka jingiadon lang ki bakhraw jong ka hima Khyriem baroh kawei.
Ha kane ka sngi la pynhun pynphing ia kane ka shad niam Nongkrem jong ka Hima Khyriem da ka jigniashim bynta lang jong ki ar ngut ki khun syiem jong ka hima kiba la shad lang ryngkat bad kiwei ki thei samla bad ki rangsamla ban pyndep ia ka jingshad niam.
U Syiem khynnah jong ka Hima Khyriem u Pa,im Hababan Sing Syiem haba kren ha ki lat pathai khubor u la ong ba ka dei ka jingshisha ba ka shad mynta u snem kam shym la long kumba juh long ha kaba ki khun ki hajar jong ka hima kim lah ban ia shim bynta ha kane ka shad ba pynlong man la u snem.
Na ka liang jong u Syiem Khynnah u la pynpaw ia ka jingsngewnguh ia u myntri rangbah ka jylla, u Symbut myntri rangbah ka jylla bad ia ki bor jong ka District Administration ba wat ha pdeng kane ka khlam kila ai jingbit ba ka Hima kan ioh ban pyndep ia kane ka jinglehniam.
Na ka liang jong u Syiem u pynpaw ia ka jingkyrmen ba kane ka khlam kaba la wan ha kane ka sla pyrthei bad ha kane ka jylla Meghalaya kan khuid noh ha kaba kum ka hima kan lah ban pyndep ia kane ka jingleh niam ha ka rukom kaba juh pynlong man la u snem.
Ha kane ka jingleh niam ka Hima kala but ryntih ia baroh ki kyndon kiba la buh da ka da ka sorkar ha kaba khlem shah ia ki nongwan peit kai ba kin rung sha poh bad kum juh sha bar jong ka jaka shad ruh ka khlem shah ia ki briew ba kin ia lum katkum ki kyndon kiba la buh da ka sorkar.
