Jowai, Iaiong 29: Ka shad sukra kaba la pynlong da ka shnong Mukhla Nongrim ha madan Slot Masi ha ka sngi saitjain ka la long kaba shongshit bad shongkun bha wathapdeng ka jingpynthut jong ka mei mariang hynrei ka pyndap da ka mynsiem kaba kmen ba ha madan shad la dap da ki riam tynrai riam khasi ha ka rukom shad tynrai ba khot shad ruwai, shad pliang bad kiwei kiwei ki rukom shad tynrai ki ba pynphuh pynphieng ia ka rynsan shad bad kumjuh ia ka mynsiem jong ki nong sakhi.
Ha kane ka sngi, la wan ban sakhi bad plie paidbah ia kane ka leh kmen shad sukra da u MLA ka thaiñ u Bah Wailadmiki Shylla u ba long kum u kongsan ha kane ka sngi, ryngkat bad ka jingiadonlang jong ki riew rangbah jong ka shnong bad la wan ban sakhi ruh da ki rangbah shnong jong kiwei kiwei ki shnong bad kumjuh u executive engineer ka Jowai South.
Ha kane ka sngi, ha shwa ban plie pyrda ia ka shad ka kmen, la ioh ia ki jingkren na ki katto katne ngut ki riew rangbah ha kaba u Shongknor ka shnong Mukhla Nongrim u Teng Sari u la long u nongpyniaid ia kane ka jingialang. La ioh ia ki jingkren jingbatai ia ka jingmut jong ka shad sukra da u Rangbah shnong ka Mukhla Nongrim, u Mista Suna bad kiwei kiwei ki riew rangbah ba la don lang. Shuh shuh la ioh ia ki tien sneng tien kraw na u Langdoh Niam ka shnong Mukhla, Wanbha Lyngdoh, halor ka ban pynim ia ka niam ka dustur riti bad ban pynjanai ia kaba u longshuwa manshuwa u la pynkhamti hangi.
Ha kajuh ka por, shwa ban ioh ka jingkren na u kongsan uba long ruh u MLA ka Jowai konstitwensi ki dkhot jong ka shnong Mukhla Nongrim lyngba u Secretary U Lakhon Sari, U la ai ka memorandum bad ha ka dorkhas sha u MLA ha kaba la buh ia ki ar tylli ki mat jngdon kam, kawei ka long ba ki kwah na u MLA ia ka madan kynjat boll haph ka shnong bad ia ka iing dorbar ne ka iing klob hapoh ka shnong.
Ha ka jingkren jong u MLA Wailadmiki Shylla, u la pynpaw ia ka jingsngew diaw halor ka jingbym biang por jong ki paidbah bad ruh ki nongpyniaid jong ka shnong ban sdang ia kane ka shad sukra ha ka por ba biang. Halor ka Memorandum, u la ong ba, ka shnong ka don jingdawa tang ar tylli hynrei na ka liang jong u, u ong ba ka shnong ka dang bun ki jingduna.
“Phi ka shnong phi iohi tang ia kine ki ar tylli ki jingduna, hynrei na ka liang jong nga, nga iohi shibun bah ki jingduna ha baroh ki liang. Kam mut ba nga shong thiah sngi shatai, hynrei nga duh thiah na ka bynta ka roi ka par ka shnong ka thaw” ong i ma Shylla. Ha shwa ban pynkut, u ma Shylla u la ai khublei shad sukra basuk ba kmen ia ki paidbah baroh. Ha ka bynta ba kut jong ka jingialang, la ioh ia ki kyntien ai khublei kyrpang tien kyrkhu kyrdoh na u Standby me Sari.
