Shillong, Nohprah 24: Ki khynnah samla 300 ngut ki shynrang bad 200 ngut ki kynthei kila ia poi ban ia shim bynta ha ka “23rd National Youth Leadership Camp” kaba la long ha kud jong ki shipai ha Narengi ha Guwahati. Ha kane ka sngi la don lang u myntri rangbah ka jylla Assam u Sarbananda Sonowal, bad ia ka NYLC la plie da u Lt Gen DS Ahuja, GOC 101 Area.
Kane ka National Youth Leadership Camp kala sdang naduh mynta ka sngi bad kan kut ha ka 31 tarik mynta u bnai. Ki jinghikai ha kine ki sngi kan long halor ka jinglong ki samla kiba iaid beit iaid ryntih, ka jingbiang por ha ka leit ka wan, ka jingiatreilang kum ki nongshong shnong jong ka Ri ban wanrah ia ka jingiatylli ha ka Ri, ha ka dong ka thain bad hapoh ka jylla bad ha ka rukom im.
Ka jinghikai kan long kum ki drill, ka jingkilan met, ki jingialehkai, ka jingialehkai kum ka kynhun bad kaba kongsan eh ka long ba kumno ban ieng hala ki jong ki kjat la ka long ha ki kam ki jam. Ka jingiakren ruh halor ka jingkylla ka suin bneng, ka jingdon ka jingbun paid bad ka jingdon kam ia ka science ha ka riti dustur jong ka Ri India.
Ha ka jingkren jong u Lt Gen DS Ahuja the GOC jong ka Area 101, u la ong ba ka long kaba kongsan ba ki khun samla kin ialeh ban sngew tynnad ha kaba pule ia ka science lada hap ban iabeh katkum ka jingkylla ha ki kor kibor jong kane ka juk kaba mynta khlem da klet iala ka jong ka riti dustur bad ban nym pyndon kam bakla ia ki.
Na ka liang jong u Lt Gen DS Ahuja, u la kyntu ia ki samla ba kin don ia ka jinglong kaba bha bad kaba khlain ha ka jingmut jingpyrkhat jong ki ban poi sha ka thong. U la ong ba haba ki leh ia kano kano ka kam ki dei ban long kiba kloi ban shimti ia kano kano ka kam kaba kham khia ban ia kaba suk.
Ha ka juh ka por u la ong ba don kam ban sumar ia lade ban ioh ia ka koit ka khiah kan nym don kano kano ka jingbei pisa palat ia ka jingkoit jingkhiah. U la ong wad juh wat jingsuk ha kaba dih buaid bad ki drugrs kine ki long ki nongpynjot ia ka jingim briew.
