Shillong, Nailar 19: Ka tnad Khaii pateng jong ka sorkar jylla ha ka 26, Naitung 2019 kala weng noh ia ka jingpynbna sorkar kaba la pynmih ha ka 29, Jummang 2019 kaba ong ba ki jaka kiba hap hapoh ki Industrial Estate kim hap shuh hapoh ka jingpeit jong ki District Council.
Ia kane ka jingpynbna ba la wengnoh ia kane ka jingpynbna sorkar la soi da u Director Commerce bad Industry jong ka sorkar jylla u bah J K Mawlong. Ia kane ka jingweng la pyntip sha u Deputy Commissioner jong ka Shillong, Jowai, Nongpoh, Nongstoin, Williamnagar bad Resubelpara.
U samla Donal V Thabah General Secretary jong ka seng samla pule KSU ha ka kyrwoh kaba la phah mynta ka sngi u la ong ba ka tei ka tnad sorkar kala weng noh mar shisngi ha dien ba ka seng kala pynpaw ia ka jingpyrshah halor katei ka jingpynbna sorkar.
Lah ban pynkynmaw ba ia kane ka jingpyrshah la pynpaw ruh da ka seng HYC bad kala don ruh ka jingiakren hapoh iing dorbar jong ka KHADC ha ka dorbar kaba dang shu dep ha u bnai ba la dep.
