Shillong, Naiwieng 16: U Bah Robinus Syngkon MLA jong ka Mowkaiaw mynta ka sngi u la phah ia ka shithi sha u shongknor jong ka iing dorbar thawain ka jylla u AT Mondal ban pyntip sha u ba u la weng noh ia lade na ka jingkyrshan ia ka sorkar MUA-II kaba la ialam da u Dr Mukul Sangma.
Na ka liang jong u Shongknor jong ka iing dorbar haba kren ha ki nongthoh khubor mynta ka sngi la ong ba u la ioh pdiang ia kane ka shithi na u MLA jong ka Mowkaiaw, ba u la weng ia lade na ka jingkyrshan ia ka sorkar jong u Dr Mukul Sangma bad mynta ka iing dorbar ka hap ban buh jaka shong ia u hapoh iing dorbar sha ka liang pyrshah.
U bah Syngkon u ba la jop ia ka election MLA ha u snem 2013 kum u kyrtong shimet bad u la kyrshan ia kane ka sorkar Congress kaba la ialam da u Dr Mukul Sangma kum u myntri rangbah ka jylla bad ha kane ka sorkar u la shah thung ruh kum u parliamentary Secretary ha kine ki snem baroh shikatta bad mynta u la weng noh ia lade na kane ka sorkar MUA-II.
