Shillong, Nohprah 11: Ha kane ka juk mynta,ka jingpynkhuid shnong ka dei kawei na ki mat ba kongsan eh jong man la ki dong ne ki shnong.Ha ki sngi bakhraw lei lei,kum ki sngi lyngkhuh dap snem jong ka sngi kha jong u Mahathma Gandhi 02 Naiwieng man la u snem,ka jingiapynkhuid shnong ka long pynban kumba ia tynneng briew.
Hynrei,hadien ba la dep pynkhuid pat,tang shiphang arphang ka lynti shnong ka la sdang jaboh biang. Ka jinglehkhuid ka long kaba donkam bad kyntang bha.Ki ong,’ka jinglehkhuid ka iajan eh bad ka jinglong ‘riew blei’.
Ban lehkhuid ia lade shi met,ha ing ha sem,ha shnong ha thaw kalong shisha kaba donkam.Tangba kam dei pat ban long tang shi por ar por.Donkam ka program kaba iai neh ban iohi shisha ia u soh jong ka jingjop jong ka jinglehkhuid.
Ha shnong Mawlynnong,kawei pa kawei ka ing ka don ka jingkitkhlieh ban lehkhuid man ka jong ka ing bad ki sawdong sawkun(compound) jongka.Ki khynnah rit naduh na ing haduh skul la hikai bad pynsngewthuh ia ki ba ki dei ban lehkhuid ia ka shnong ka thaw.
Ka dorbar haduh ki nongshong shnong ki don ka jingkitkhlieh lang ban peit ia ka khuid ka suba jong ka shnong.Na kata ka daw ka la ioh nam kum kawei na ka shnong kyndong kaba khuid tam ha India.
Ia ka nuksa jong ka Mawlynnong la kwah ia bud lem kiwei kiwei ki shnong.Lah don ruh iwei-ar ki shnong kiba lah bad don ruh kiba lah kham palat ka jingkhuid ia ka Mawlynnong ruh hynrei dang bun pat kiba dei ban dang pyrshang tyngeh ban wanrah ka jingkhuid nangne shakhmat ter ter.
Ban shu pynkhuid shisien arsien ha ka shi snem kam don jingmut.Ka jingbuh tin/plastik thep nuit ruh i kumba shu long kam kai lut namar wat lada ki dap bad shlei ki jaboh ruh ym don ba peit ne phikir satia.
Lah i leh rain pynban ki nongiaid nongieng ha lynti ha synkien.Ha ka jingshisha,kum mynta ki por ba kham pahuh ki fund shnong,ia ki tin/plastik thep nuit dei ban phah peit bad pynkhuid ha ki volunteer shnong lane buh briew nongpynkhuid da kaba siew bai pynkhuid kynta noh 1000 tyngka shi bnai ba kin pynkhuid tang tang shi kynta ei ei shi step.
Uwei na sha ka dong mihngi,uwei pat sha ka dong sepngi,shatei shathie ter ter jong ka shnong tang shi snem ruh,ki trai shnong ki la mlien,ki la sdang sngewthuh bad iohi nuksa ban lehkhuid noh.
Ynda ki la mlien,kumta ruh kin sa ia myllen. Ki shnong ba kham heh kham iar kiba don bun tylli ki dong,ki lah ruh ban ai prize ne award ia ki dong kiba lah ban leh khuid tam.Ki nongmihkhmat kum ki MLA/MDC ruh kidei ban ia peit kyrpang bad ai jingiatrei lang bad ki bor shnong bor raid.
Ka sorkar lyngba ki Block ne Department sorkar bapher bapher kum ka PWD,PHE,Health,etc kim dei ban shu ieh tang ha ki bor shnong bor thaw hynrei kidei ban ia peit bad shimkhia lang lada ki kwah shisha ban wanrah ia ka jingkhuid kylleng ki shnong ka ri Khasi-Jaintia.
Nalorkata,dei ban ai jinghikai lang (awareness) bad wat ban ai jingsneng ruh ia ki nongshong shnong,ki khynnah skul bad ki riew paidbah nongiaid nong ieng baroh ba kin tip ia ka dor jong ka jinglehkhuid.Lada kiwei ki shnong ki lah,balei kiwei kim lah.
Lada ia kitkhia lang bad ia kwah lang,ym don ka bym lah.Sdang noh ban pyni nuksa ia kiwei pat ki jylla ka ri India ba ngi dei shisha kata ka ‘Scotland of the East’ kumba la ai nam ki Phareng naduh ki por mynshwa.
U(L)Prof.G G Swell,u Ex.MP jongngi mynshwa,u la kren bad ai jingiaroh bha ia ka ri jongngi hapoh Parliament ka ri India ba ‘ka dei ka ri jong ka jingkyrkhu kyrpang,ka ri jongka jingitynnat bad ba ka long ka nuksa ba bha tam hakhmat ka ri India ba iar'(a patch of grace and beauty and the shinning outpost in India).
