Shillong, Nohprah 21: U Dr Mukul Sangma myntri rangbah ka jylla u la iathuh ba ka sorkar kala iohi ia ki jingeh jong ki khynnah pule ha dien ba la mih ka result matrik ha kaba bun ki shem shitom ioh rung klass.
Khang ban pynsuk ia ki samla pule ba kin ioh rung klass, ka sorkar kala shim ia ka rai ban ai ka jingithuh ia ki khyndai tylli ki college ha ka jylla kum ki “Community College” bad kita ki long ka Nongstoin College Nongstoin, Tirot Sing Memorial Mairang, Ri Bhoi College Nongpoh,Shangpung College Shangpung, Jaintia Eastern College Khliehriat, Ampati College Ampati, Tura College Tura, Chokpot College Chokpot, Rongjeng College, Rongjeng.
Ia kine ki college ka sorkar kala phiah ha ki ar bynta, ia ki college kiba la don la tip kum ki “Brown Filed” bad ia kiba ka sorkar dang hap ban bei pisa ba tei thymmai ia ki iing ki snem la tip kum ki “Green Filed”. Ia ki college kiba la don lypa ka iing ka sem ka sorkar kan bei pisa T.2 klur tyngka ban pynbiang ia kawei pat kawei ka College.
Katba ia ki college kiba hap ha ka “Green Filed” kaba mut ba ki college kila don hynrei kim don ia ki iing ba paka ka sorkar kan bei pisa T.10 klur kawei pat kawei ka college ban tei ia ka College. Kane kan long tang ha ka bynta kaba nyngkong. Ka jinglut baroh na ka bynta jong kane kan long T.50 klur tyngka.
Haba ia dei bad ka jingthung ia ki nonghikai, yn but beit katkum ki kyndon jong ka University Grant Commission (UGC) bad ka jingsiew ia ki ruh kan long katkum ki kyndon jong ka UGC. Ka jingiapher hangne ka long ba ia ki nonghikai ha kine ki college ka Managing Committee kan thung bad ka sorkar kan bei pisa. Ka jinglut ha kaba siew ia ka tulop jong ki nonghikai kan long T.53.64 klur.
Kine ki college baroh kin don ia baroh lai tylli ki shnat pule, kata ka long ka Arts Stream, Science Stream bad ka Commerce Stream. Da kaba leh ha kane ka rukom ki samla pule na ki nonglyndong kin nym ia beh ban wan sha ki jaka sor ka ban ktah ia ka pla pisa jong ki kmie ki kpa ban ioh pule hynrei mynta ha jaka jong ki kila lah ban ioh ia ka jingpule kaba ki kwah bad kane kan pynduna ia ka jingwan tuid jong ki samla pule sha ki jaka sor.
Ki nonghikai kiba ban sa thung ha kine college kin nym shah pynkynriah kam na kawei ka college sha kawei pat shisien ba kila shah thung ha kano kano ka college kin neh ha ka juh ka jaka haduh ba kin dang shongthiat na ka kam. Ia kine ki College namar ka Managing Committee ba kan peit hynrei ki paidbah nongshong shnong ruh kin don ia ka bynta kaba kongsan ban ia peit lang.
