Shillong, Rymphang 11: U bah Lamphrang Kharbani president jong ka seng HANM u la ong ba ka seng kan pynlong ia ka jingiakhih da kaba shong kyllain mungor ha ka 20 tarik mynta u bnai ha jan additional secretariat ban dawa na ka sorkar ba ka dei ban pynbeit noh ia u pud u sam bad ka jylla Assam.
Haba kren ha ki nongthoh khubor mynta ka sngi u tei u nongialam jong ka seng HANM u pynkynmaw ia kaei kaba u Bah Prestone Tynsong u ba dei u symbut myntri rangbah ka jylla u la kren ha ka por ilekshon ba lada ka NPP ka wan ha ka bor kin pynbeit noh ia u pud u sam bad ka jylla Assam.
U Bah Kharbani u la ong ba ha dien kane ka jingiakhih shong kyllain myngor lada kam sei soh na ka liang jong ka seng kan pynlong ia ka jingialang paidbah halor kane phang, lada ka sorkar jylla kam lah ban leh ei ei ka seng kan leit hi ban ia kren bad ka sorkar Assam.
Ha ka juh ka por la dawa ba ka sorkar jylla kam dei shuh ban dang pynslem ha kaba pyntrei kam noh ia ka ILP ha kane ka jylla Meghalaya, la ong u Bah Kharbani mynta ka sngi ha ki lad pathai khubor ha Shillong Press Club.
